New Delhi, ïaïong:
U heh nongïalam jong ka seng Aam Aadmi Party (AAP), u Arvind Kejriwal, u la thoh da ka shithi kaba thikna sha ka nongbishar jong ka Delhi High Court, ka Swarana Kanta Sharma, ha kaba u la pynbna ba un ym ïashim bynta shuh ha ka jingbishar halor ka mukotduma jong ka tnat Excise hakhmat ka kynhun nongbishar jong ka. U Myntri Rangbah barim u la pynpaw ba un ym mih hi dalade ne lyngba ki nongïasaid aiñ, kaba pyni ïa ka jingïakynduh kaba duna bad kaba beit beit bad ka kynhun bishar, la ïathuh ka tyllong khubor, hynnin ka sngi.
Ha ka shithi, u Kejriwal, u thoh kumne: “Ka jingkyrmen jong nga ban ïoh ïa ka jingbishar hok, na ka Justice Swarana Kanta, ka la dkut noh. Kumta, nga la rai ban bud ïa ka lynti jong u Mahatma Gandhi, kaba long ka Satyagraha.” U la kdew ba ka rai ka dei ka mat jong ka “jingsngewthuh jingmut” bad u la buh ïa ka hok ban tuklar ïa ki rai ba dang shen jong ka ïingbishar ba hakhliehduh.
Kane ka jingjia ka long hadien ka rai jong ka High Court ha ka 20 tarik, Ïaïong ban kyntait ïa ka jingkyrpad jong u Kejriwal halor ka jingkyntait jong ka Justice Sharma. U Kejriwal u la pynpaw ïa ki jingkynnoh kiba khia ha kaba ïadei bad ka “jingtieng kaba don nongrim ïa ka jingsngew shiliang khmat,” da kaba pynleit jingmut nyngkong eh ha ka jingpynrung kyrteng ïa ki khun jong u nongbishar kum ki nongïasaid aiñ jong ka sorkar pdeng hapoh u nongïasaid aiñ ba hakhmat eh.
Katkum ka kaiphod jong ka LiveLaw, u Kejriwal u la kdew ïa ki jingtip RTI kiba kam ba ïa u khun jong u nongbishar la aiti ïa ka kam kaba bun bha hapdeng u snem 2023 bad 2025, da kaba kynthoh ba kum kine ki jingai kam na ka bor pynngat (ka sorkar pdeng) ka wanrah ïa ka jingïakynad. U la kdew ruh ïa ka jingïashim bynta jong u nongbishar ha ki jingïalang ba la pynlong da ka Akhil Bharatiya Adhivakta Parishad (ABAP), ka seng kaba u la batai kum ka seng kaba pyrshah ïa ka AAP ha ka rukom pyrkhat.
Da kaba kyntait halor ki jingkynnoh, ka Sharma ka la khot ïa katei ka jingpan jingbit kum ka jingpyrshang ban “bishar ïa u nongbishar” da kaba pynshong nongrim ha ki “jingkynnoh bad ki jingpynbyrngia” ym ha ki sakhi.
Ka jingïakhun lyngba ka aiñ ka sdang na ka rai jong ka 27 tarik u Rymphang, 2026, ha kaba ka ïingbishar ba nyngkong ka la pyllait noh ïa u Kejriwal bad 22 ngut kiwei pat, da kaba shem ba ki sakhi jong ka kynhun CBI kim pat biang ban bishar. Mar mar ka CBI ka la pynibor ïa kane ha High Court. Ka jingïakynad hapdeng ki ar tylli ki kyrdan bishar ka la mih ha ka jingbishar ba nyngkong eh ha ka 9 tarik u Lber, ha kaba ka Sharma ka la pynsangeh ïa ka jingbthah jong ka ïingbishar ba nyngkong na ka bynta ka jingtohkit jong ka tnad halor u ophisar tohkit jong ka CBI, da kaba ai kyrteng ïa ki jingkren beiñ jong ka ïingbishar ba shapoh kum “ki jingkren bakla.”
