New Delhi, ïaïong:
Palat 30 tylli ki hospital ha ka nongbah shen kin sa don ïa ki “kamra ba pyngngad” ban ai jingïarap mardor ïa ki briew kiba shah ktah na ka jingshit bad ki jingpang kiba ïadei bad ka jingshit. Kane ka sienjam ka dei shi bynta na ki sienjam ba la pynbna da ka sorkar Delhi ha kine ki khyndiat sngi, kiba thmu ban shimkhia ïa ki jingeh ba kyrkieh kiba ïadei bad ka jingshit jingkhriat. Ka nongbah jong ka ri ka la sakhi ïa ka jingshit kaba jur tam kaba long 42°C ha ka sngi U Blei, bad ki bor synshar ki la pynmih ïa ka jingpynbna halor ka jingshit kaba jur bha ha ki sngi kiba bud.
La khot ïa kane ka Heat Wave Action Plan, 2026, ka sorkar kan pynbeit ïa ki dawai ba kongsan ha palat 339 tylli ki jaka sumar ha kylleng ka nongbah hapoh jong ka. Ka Myntri Rangbah ka jylla ka Rekha Gupta ka la ong ba ka Delhi ka la ïohi ïa ka jingshit kaba la palat ïa ka 40°C la jan 40 sngi lynter ha kine ki ar ne lai snem ba la dep, kaba la pynlong ïa ka jingdonkam ïa ka plan kaba kyrpang na ka bynta ka nongbah.
Ki heh sorkar ki ong ba mynta u snem, ka sorkar ka la pynlong ïa ka jingpeit bniah ïa ka nongbah baroh kawei da kaba pyndonkam ïa ki jingtip na ki Satellite ban ithuh ïa ki jaka ba don jingma. Napdeng ki jaka ba jur bha ka jingshit ka dei ka Ayanagar, ha kaba mynshwa ka la don ka jingshit kaba jur bha haduh 45.5°C. Ka Najafgarh kaba 43.7°C ha u snem 2025 bad ka Safdarjung kaba 46.8°C ha u snem 2023 ruh ki la ïohi ïa ka jingshit kaba jur palat. Kiwei pat ki jaka ba jur ka jingshit jingkhriat kiba dang mih ki kynthup ïa ka Wazirpur, Jahangirpuri, Khayala, Shatri Park, Vishwas Nagar, Harkesh Nagar, Hari Nagar, bad Delhi Gate.
Ka sorkar ka la tyrwa ïa ki lad jingïada ba kyrpang na ka bynta kine ki zone, kynthup ïa ka jingpynbun ïa ka jingdon jong ki ORS ha ki jaka sumar, ka jingpynkynriah ïa ki kynhun ba ïarap kiba kloi, bad ka jingbuh ïa kiwei pat ki kali kit um.
Kiwei pat ki jingtyrwa hapoh ka plan ki phaikhmat sha ki khynnah skul bad ki nongtrei. Ki tnad sorkar ki lah ban ai ïa ki jingpynbeit ORS ïa ki khynnah skul shwa ba kin mih na skul, lada donkam. Ka sorkar ka lah ban pynsangeh noh ïa ki kam shabar hapdeng ka por 12 baje shiteng sngi bad 3 baje janmiet ha ka por ba jur bha ka jingshit. Yn pynbiang ruh ïa ki nongtrei da ka um dih, ki tupia bad ki jaiñ ñiad syep. Yn pynbiang ïa ki tiar ai jingïarap ba nyngkong bad ki Ice Pack ha ki jaka trei lada donkam.
Ka sorkar ka la ong ba ka la pyndonkam ïa ka jingtap kaba pynshai ha ka jaka kaba heh haduh 28,674 sq ft ha ka khyrdop Kashmere ISBT.
