Bhubaneshwar, ïaïong:
U Myntri Rangbah jong ka jylla Odisha u Mohan Charan Majhi u la pynbna ba kin sa don kumba 800 tylli ki skul ha kylleng ka jylla ki ban shah pynkylla ha ka rukom hikai hapoh ka jingtreikam jong ka skhim PM Schools for Rising India (PM SHRI).
U Myntri ka tnad Pule-Puthi jong ka sorkar pdeng u Dharmendra Pradhan ha ki khyndiat sngi ba la leit, u la ong ba shen yn sa buh ïa ki 800 tylli ki skul PM SHRI kiba thymmai ha baroh kawei ka jylla.
Haba kren ha ka jingïalang ha Vikram Deb University ha Jeypore, u Pradhan u la ong, “Hashwa, kam shym la don satia ka jingsngewtynnad na ka sorkar barim ban pyntreikam ïa ka skhim PM SHRI.
Hynrei, da ka jingwan jong ka sorkar bathymmai ba la ïalam da ka BJP ha ka bor synshar ha Odisha, ka lynti ka la plie na ka bynta ban pyntreikam ïa kine ki skul, kaba kan ai jingmyntoi shibun ïa ki khynnah pule.”
La mang ïa ka pisa na ka bynta ban seng ïa ki 800 tylli ki skul kiba la khmih lynti ba kin sa treikam noh shen.
U Pradhan u la ong ba ka sorkar ‘Double-engine’ ka thrang ban kyntiew ïa ki jaka riewlum ha ka distrik Koraput kaba khlem phiah.
U la pynbna ba ka Central University of Odisha (CUO) shen kan sa ïohi ïa ki jingpynbha ïa ki jingtei, bad yn sa seng ïa ka Kendriya Vidyalaya kaba thymmai ha Jeypore.
“Kine ki jingthmu kin kyntiew ïa ka jingïoh ïa ka jingnang jingstad bad ka jingtbit hapdeng ki khynnah pule. Ka sorkar jong ngi kan wanrah ïa ki jinghikai kiba mynta kiba don tynrai ha ka Science bad Technology, kiba ïahap bad ki jingdonkam ba mynta. Ka Central University kan sdang ban ai ïa kum kine ki jinghikai naduh u snem ban wan,” u la ong.
Ha kane ka sngi la donlang ruh u Myntri ba dei khmih ïa ka Higher Education u Suryabanshi Suraj, u Myntri ka Mass Education u Nityananda Gond, u Myntri ka tnad Animal Husbandry bad u Myntri ka tnat Fisheries u Gokulananda Mallik, bad u MP ka Nabarangpur u Balabhadra Majhi.
