Chennai, ïaïong:
Ka India Meteorological Department, ka la pynjlan ïa ka jingai ïa ka khubor ba dei ban husiar ha ki katto katne ki distrik jong ka Tripura, haduh ka 1tarik, Jymmang, da kaba maham ïa ka jinghap slap kaba jur haduh kaba jur bha ryngkat bad ka jingtied pyrthat bad ka lyer kaba jur ha kine ki sngi ban wan.
Katkum ka jingkheiñ jong ka Meteorological Centre ha Agartala, u slap uba jur bha hapdeng 7 cm haduh 20 cm u lah ban jia ha kawei ne ar tylli ki jaka ha kylleng ka Khowai, West Tripura, Sipahijala, Gomati bad South Tripura distrik ka ban ïai bteng haduh ka 30 tarik, Ïaïong.
Na ka bynta ki distrik kiba dang sah, la pynmih ïa ka jingmaham kaba hap ban husiar, kaba pyni ïa ka jingjur slap kaba mar ïaryngkat.
Ka jingïathuh lypa ka maham ruh ïa ki jingbeh jong ka lyer slap bad ki jingtied pyrthat bad ki lyer kiba jur na kiba jur bha bad ka jingstet kan poi sha ka 50 haduh 60 kmph ha ki bynta jong ka jylla.
Ka IMD ka la pynjlan shuh shuh ïa ka jingmaham kaba jur naduh ka 30 tarik, Ïaïong haduh ka 1 tarik, Jymmang na ka bynta ki distrik West Tripura bad Sipahijala, ha kaba la khmih lynti ba ka jinghap slap kaba jur kan dang ïai bteng.
Kiwei pat ki distrik kin dang bteng hapoh ka jingpynbna ba dei ban husiar ha kane ka por.
Naduh ka 2 tarik, Jymmang, la khmih lynti ba ka jingmaham kan kham jem khyndiat, ha kaba ka Sipahijala bad ka South distrik kin dang sah hapoh ka jingmaham kaba dei ban husiar, katba kiwei pat ki bynta jong ka Tripura kin don hapoh ka jingmaham kaba kham duna ki jingshah thombor ha ki bor ka mariang.
Kane ka jingmaham ka wan hadien ka jinghap slap kaba jur bha kaba la ïoh jingtip ha kylleng ka jylla namar ka jinghap slap kaba long baroh shimiet.
Ka jingkheiñ jong ka sorkar, ka pyni ba ka North Tripura, ka ïoh ïa ka jinghap slap, kaba 37 mm, katba ha Unakoti, ka ïoh ïa ka jinghap slap, kaba 17 mm.
Ka Dhalai distrik ka la mad ïa ka jinghap slap kaba 99 mm, bud sa ka Khowai kaba 68.8 mm bad ka West Tripura kaba 91.5 mm. Ka Sepahijala, ka long kaba bun eh u slap, ha kaba ka long 145.5 mm, katba ha Gomati, ka ïoh 79.1 mm bad ha South Tripura, ka long 77.0 mm.
Ki bor pynïaid ki dang buddien bha ïa kane ka jinglong jingman namar ba ka jinghap slap kaba bteng ka lah ban wanrah ïa ka jingshlei um ha ki jaka them bad pynthut ïa ka jingim kaba man ka sngi.
La bthah ïa ki nongshong shnong ba kin long kiba husiar, khamtam ha ki por ba jur bha u slap bad ka lyer.
