New Delhi, ïaïong:
Ka nongïalam ka Liang Pyrshah ha Delhi Assembly ka Atishi ha ka sngi Ba-ar ka la buh jingkylli ïa ka sorkar Delhi ba la ïalam da ka BJP halor ka jingkular jong ka ha ka jingthep vote ban ai pisa T.2,500 shibnai sha ki kynthei, da kaba kynnoh ba wat tang “25 pisa” ruh kam shym la poi sha ki nongïoh myntoi.
Haba kren ha ka jingïalang bad ki nongthoh khubor, ka Atishi ka la ong ba hashwa ka elekshon sha ka ïingdorbar thawaiñ jong ka Delhi ha u bnai Kyllalyngkot 2025, u Myntri Rangbahduh u Narendra Modi u la kular ba ki kynthei ha ka nongbah jong ka ri kin sdang ban ïoh pisa T.2,500 ha ki Bank Account jong ki naduh ka 8 tarik u Lber, ha kaba u la khot ïa kane ka “Modi Ki Guarantee”.
“Shwa ba ka jingïalang kaba shisngi jong ka Ïingdorbar Delhi kan sdang, ngi kwah ban kylli ïa ka sorkar Delhi ba la ïalam da ka BJP kawei ka jingkylli: lano ki kynthei jong ka Delhi kin ïoh ïa ka T.2,500 ba la kular ïa ki?” ka la ong. “Ka 8 tarik, Lber, 2025 ka la ïaid bad mynta wat ka 8 tarik, Lber, 2026 ka la dep ïaid. Klet noh ïa ka pisa T. 2,500, wat tang 25 pisa ruh kam pat poi sha ki Account jong ki kynthei jong ka Delhi.”
Kum shi bynta ban thalaiñ ïa ka Myntri Rangbah ka jylla ka Rekha Gupta, ka Atishi ka la ong, “Ka leit ïalap elekshon sha West Bengal bad ka kular pisa ïa ki kynthei hangtei, nga kwah ban kylli ïa ka, phi la dep pynbiej ïa ki kynthei nongbah Delhi.”
Haba wanrah ïa kiwei pat ki mat, ka Atishi ka la kynnoh ba ki kynthei mynta ki hap ban ïeng laiñ ban ïoh ïa ki Pink Card na ka bynta ki bos DTC bad ki ïakynduh jingeh ban ïoh ïa ki lad jingsumar khlem jingsiew kiba kham mynshwa ha Mohalla Clinics.
Katba u MLA ka Burari u Sanjeev Jha u la ong, “Ka BJP ka pyndonkam ïa ka Ïingdorbar Delhi na ka bynta ki kam rit paid. Ki kynthei kin ïoh bor shisha tang ynda ki la ïoh ïa ka hok jong ki. Ka sorkar ka dei ban pyndep ïa ka jingkular jong ka kaba long T.2,500 tyngka.”
Ka Atishi ka la kynthoh ïa ka jingpynbna jong ka Rajya Sabha Secretariat kaba pdiang ïa ka jingpynïasoh ïa ki hynñiew ngut ki MP ka AAP bad ka BJP, da kaba ong ba ka long “ka bym long aiñ bad ka bym ïahap bad ka Riti synshar”, bad u la ong ba ka Riti synshar kam shah ïa kum kine ki jingpynïasoh hapoh ki kyndon pyrshah ïa ka jingphet seng.
