Hyderabad, ïaïong:
Ka Telangana ka la jubab ïa shi lak na ki 1,20,000 tylli ki aplikeshon kiba ka la ïoh hapoh ka aiñ Right to Information Act ha kine ki ar snem ba la dep, ong ka khubor jong u Chief Information Commissioner ka jylla u G Chandrashekar Reddy.
U Information Commissioner u la pynpaw ïa kane haba kren ha ka jingïalang pynsngewthuh paidbah halor ka aiñ RTI ba la pynlong na ka bynta ka jingmyntoi jong ki Public Information Officers (PIOs) bad ki bor synshar ha Nalgonda Collectorate ha ka sngi Ba-ar.
U la ong ruh ba tang ha kine ki shiphew bnai, ka State Information Commission ka la pynbeit haduh 15 hajar tylli ki mukotduma.
“Ha kine ki ar snem ba la dep, ka State Information Commission ka la leit jngoh ïa ki 18 tylli ki distrik bad ka la pynbeit ïa baroh ki mukotduma kiba dang sahkut ha kine ki 5 snem ba la dep, la shim khia ruh ïa ki 15 ngut ki Public Information Officer (PIO) kiba thmu ban buhrieh ïa ki jingtip,” u la ong.
“Mynta ki don 10 hajar tylli ki mukotduma kiba dang sahkut ha ka Commission.Baroh ki mukotduma lait noh kiba ïadei bad ka tnad Revenue bad Municipal yn sa pynbeit noh hapoh ka 15 tarik, Jymmang”, u la bynrap.
Haba batai ïa ka Right to Information (RTI) Act kum ka atiar kaba khlaiñ bor ha ka kti jong ki nongshong shnong ban wad bad pynthikna ïa ka jingkhuid bad ka jingkitkhlieh hapoh ka synshar khadar, u la ong ba ki paidbah ki don ruh ïa ka bor ban jurip ïa ki kot ki sla buh jingkynmaw bad ki kam kiba shabar ka jaka treikam.
