I. R. Dkhar
Dang kumba arbnai mynta, ha ka 17 tarik u Lber, ka Sorkar ka la pyndam noh ban shna ïa ka surok na suiñ ne ka flyover na Umshyrpi sha Barik, kumba la thoh ha ki Kotkhubor. La ong ba namar ka jinglong ka jaka, ka tnat shipai kim mynjur bad ki la ai jingmut ban tei noh da ka saw-tnat surok ne ka 4-lane, la ong shuh shuh ki Kotkhubor. Imat ka don kaei re kaei sha lyndet kaba tang kine ki tnat shipai ki tip. Lada ngi pyrkhat ha kane ka liang, ngi sngew ban ong ba ka Sorkar imat ka tieng ïa ka Tnat Shipai namar katba ong ma ki, ka hap ban kohnguh.Kane ka mut ba hato ki jaka puta hangne ha Sor Shillong kiba la ioh shong bad la long nongkynti ki shipai naduh ki por mynshuwa, ki lah ban leh katba ki mon ? Lada ka Sorkar ka donkam na ka bynta ka jingbit jingbiang ki nongshong shnong jong ka Jylla, ki shu khang beit ne ki hap ban kohnguh ïa ka Sorkar? Namarkata, donkam ban don ka jingïapyrkhat bad ka jingïamir-jingmut lang hapdeng ka NHAI (National Highway Authority of India), ka PWD (Roads) jong ka Jylla, ka Soirkar India bad ka Sorkar Meghalaya.Kaei kaei kaba dei na ka bynta ka jingbit jingbiang bad ka bha ka miat ki nongshong shnong jong ka Jylla khamtam hapoh Sor Shillong, donkam ka jingïamynjur lang.Kata ngi khot ka jingkylla na ka bynta ka roi ka par kaba dei ban wanrah ha ka leit ka wan, Kumba ngi tip baroh, ka jingsahkut ne ka jingblok kali ka long kaba nang jur katba nang mih ki sngi ha Shillong.
To mynta ka Sorkar ka la mynjur ban shna noh da ka 4-lane ïa katei ka bynta, hato ka Sorkar ka mut ban pyndam noh ïa kiwei kiwei ki bynta ruh ban shna flyover? Kumba ngi tip, naduh mynshuwa ka Sorkar ka la don ka jingthmu (proposal) ban shna ïa ka flyover na Barik sha Iewduh, na Malki sha Laitumkhrah, na Dhankheti sha Laitumkhrah-Fire Brigade bad kumta ter ter. Hynrei ngi ki nongshong shnong, ha Nongbah Shillong kiba la ap khmih lynti ïa kane ka bynta, ngim don jingtip eiei shuh haduh kane ka por. La ka Sorkar kan ïaid shakhmat ne kumno. Ka Sorkar NPP ka dei ka Sorkar kaba ngi khmih lynti ïa ka jingroi jingpar (development).Ka dei ka Party kaba synshar ïa ka Jylla mynta.Kane ka NPP ka la ju pyrta shla bad ïalap na ka por sha ka por ban wanrah ïa ka roi ka par bad ma ngi ki paidbynriew ruh ngi kyrmen bad khmih lynti ïa kata.
Kumba ngi peit, ki don ki jaka bad ki bynta kiba ka Sorkar NPP ka dei ban shna ïa ka flyover bad don ruh ki bynta kiba la dei ban shna da ka 4-lane. Ki flyover ki dei ban don bad ki 4-lane ruh ki dei ban don. Yn nai da ïa ong ba dei tang ka Jylla Meghalaya ka bym don ïa ka roi ka par ha kaba ïadei bad ki surok la ha Sor ne khap sor ne ha nongkyndong. Ngi tip baroh ba ki surok ki dei u budlum na ka bynta ka roi ka par ha ka kit ka bah, ka leit ka wan, pynban ki sah kumjuh. Lada ka long kumne, ngam tip sa kaei ka Sorkar ka ban wan ka ban pyrkhat ha kane ka liang.
Te da kane, ngi pynsngew sha ka Sorkar NPP, kaba sah sa tang arsnem ha ka jingsynshar jong ka, ban leh eiei noh ha kane ka bynta. Ngi kwah ban tip na ka Sorkar, lano kan pyntrei ïa kata ka 4-lane kumba ka la ong, kumba la paw ha ki Kotkhubor ban shna ïa kata ka 4-lane na Umshyrpi sha Barik ? Sa kawei ngi kwah ban tip, hato ka Sorkar ka thmu ban pyndam lut ïa ka proposal jong ka ban shna ïa ka flyover ha kiwei kiwei ruh ki bynta jong ka Nongbah Shillong.Lym kumta ka jingkren, ka jingialap bad ka jingpyrta shla jong ka ïa ka roi ka par bad ban shna pynheh ïa ki surok, ka long tang ka ‘khlein la thang jwat la bam’, tang ka ktien khlem ki kam.Ngi ki nongshong shnong jong ka Nongbah Shillong ki ïai lyngwa bad ïai ud ïai nam man ka sngi ha ki jingleit jingwan jong ngi da ki taxi bad ki kali shimet. Tip lehse, tang ka Sorkar kaba kumno ka ban wan, lehse kan wan ka jingkylla ha ka roi ka par. Ki don bun kiei kiei ki mat kiba ka Sorkar ka la dei ban leh bad pynlong kam, kiba ym lah ban thoh lut, hynrei tang ïa kane ka bynta, kaba ngi kum ki nongshong shnong, ngi don ban pynpaw, ha kaba ïadei bad ka jingïaid shakhmat ne ka jingïeh-noh ïa ka flyover ha Nongbah Shillong.
