Chandigarh, Jymmang:
Ki la don ar tylli ki jingujor ejahar hapoh ki kyndon bym lait jamin, ki pulit ka Punjab ki la mudui pyrshah ïa u MP ka Rajya Sabha u Sandeep Pathak, uba dang shen u la mih noh na ka seng Aam Aadmi Party (AAP) bad pynïasoh sha ka seng Bharatiya Janata Party (BJP).
Ki tyllong khubor, ki ïathuh ba ïa kine ki ejahar, la mudui ha ki distrik bapher bapher jong ka Punjab, halor ka jingkynnoh, ba u donkti ha ki kynthei bad ki kam bamsap, bad ba u lah ban shah kem shen.
Ka kynhun ki Pulit jong ka Punjab, ki la poi sha ka ïing sah jong u Pathak ha Delhi, hynrei u la dep ban mih noh na ka ïing jong u kaba don ha Pandara Park, shwa ba kin poi. Hadien la pynher ïa ki pulit jong ka Delhi shabar ka ïingsah jong u, ha kaba u SHO jong ka Tilak Marg Police Station bad katto katne ngut ki ophisar ki don lang, kaba la pynkhlaiñ ïa ka jingpahara ha katei ka jaka.
Ha ka por ba la buh ïa ki FIR ka la don ka jingïakynad ha ka saiñpyrthei, ha kaba la pynshisha ba ka BJP bad ka Shiromani Akali Dal ki la ïakynduh jingeh, ha ka saiñ hima sima”.
U Pathak, lem bad 6 ngut kiwei pat ki MP jong ka Rajya Sabbha, ba kynthup ïa u Raghav Chadha, dang shen ki la phet seng bad pynïasoh ïa ka kynhun jong ki bad ka BJP. Hadien kane, ka sorkar AAP ka la wanrah bad jop ïa ka jingshaniah ha ka ïingdorbar jong ka Punjab.
Haba kynthoh halor kane ka jingjia, u President ba mynta jong ka BJP na Punjab, u Ashwani Sharma, u la kynnoh ba ka dei ka jingleh pynrem saiñ pyrthei. U la ong ba katei ka jingleh ka pyni ïa ka “jingtieng bad jingsyier” hapoh ki nongïalam jong ka AAP. “U Sandeep Pathak mar ïa mih na ka seng AAP bad pynïasoh sha ka BJP, la ujor ejahar pyrshah ïa u da ka non-bailable FIR, kane ka pyni ba u Arvind Kejriwal bad u Bhagwant Mann ki pyndonkam ïa ki pulit kum ka atiar saiñ pyrthei”, u la ong.
