Raphael Warjri
Lada shu antad ba lada ki paid riewngeit Khristan kin ym lapmiet than ha ki kam balang,bad ki tyngkai noh katto katne ka por na ka bynta ban tip la ka tynrai lajong kan da long shisha ka jingmyntoi ym tang shimet hynrei ïa ka jaitbynriew baroh kawei. Hynrei ka jingeh ka long ba ka rikynti kaba la ioh pateng da ki phew hajar snem ka khyllem jraiñ raiñ raiñ tang hapoh shikhyllipmat ki jali jaum bad pnah thylliej na ki riewshitrhem balang Khristan ha kita ki por. Ynda la mad shilynter ïa kita ki jali jaum sa kumba arspah snem la ïai buaid sah khlem lah khyllie shuh la ki khmat wat haduh mynta, namar dang tyndep sah kata ka jingïalap ban shu ngeit lang matlah.Kita ki pnah thylliej ki la shla ïa ka dor jong ki rikynti tynrai bynriew kum kaba sah dum, sah dien, sah bieit bad baroh baroh ki la shu ngeit matlah bad dang ïai thame ha kata. Haba shahshkor ïa ki khana ka jingim jong u Jisu Khrist, ym don mano mano ha pyrthei ki ba ym shoh mynsiem bad um ka dohnud. Hynrei haba ki sawa jam lyngba ki jali jaum jong ki pnah thylliej kiba dei na kawei ka kynhun balang, ki para riewngeit ki shoh bieit bad tur ruma kat sha ba lur kata ka balang. Ynda la wan mih shuh sa kiwei kiwei ki balang pat la sdang sa ka ïa nujor bad kawang ktieh markylliang.Dei hangta ba manla ki paid riewngeit Khristan ki shakri ïa la ki balang lajong bad klet noh ïa ka jingim riewblei kum u Jisu Khrist bashisha. Kumta kita ki paid riewngeit balang ki dei ban kyndit bynriew noh na ka ba shoh tyndep bad na kaba thame sah ha ka byrtong jong ki mynder na shiliang duriaw.
Kaei ka ba la pashat jingmut ka long ba dei ban long adkar ha baroh ki kam kiba dei ha ka jingim briew ba manla ka sngi. Ka por kaba pynleit bun tam eh ka dei ha kaba kamai jakpoh ban bsa ïalade bad ïa la ki khun ki kti, ki kmie ki kpa ba kata ka long kaba donkam tam eh ha ka imlang sahlang.Kiba imsngi ban kamai kajih ïa la ki jingdonkam ha la ïing la sem ki long ki briew ki ba don ka jingkitkhlieh na ka bynta ban im ka jingim kaba bit ba biang ïa lade shwa nangta sa ïa ki khun kiba dang ap bam ryngkat bad ki kmie ki kpa ba lah tymmen kiba ym lah shuh ban kamai. Ka bam ka dih, ka ïing ka sem bad ka jaiñ ka nep ki long kiba baroh ki bynriew ki donkam tang kat ban shu ïa biang briew ha ka imlang sahlang.Kiba ym don kum kata ka jingkitkhlieh ki kylla sha ka kam tuh kam thiem, sha kaba leh ki kam bymman laiphewjait tang ban biang la ka met. Kito kiba kham pahuh ka kamai kajih ki lah ban kyntiew ïa la ka kyrdan jingim briew kum ha kaba bam ka jingbam ba kham tei ne kham shngiam, thied ki jaiñ ki nep ki ba kham bha kham rem dor, bad thaw ka ïing ka sem kaba kham bit kham biang na ka bynta baroh kiba ïa shong lang ha kajuh ka longïing longsem. Palat na kata kito ki ba kham pahuh shuh shuh ka kamai kajih ki lah ban dang ïai kyntiew ïa la ki jingdon jingem kiba yn pynsuk, pyntngen, pynshngaiñ bad don ruh kiba angnud ban pynirong hakhmat ka imlang sahlang, lehse kum ki mar ki mata kiba kham kynsai, ba kham rem dor ba lah ban leh sahuh.
Haba la biang kita baroh kaba donkam ha ka jingim briew ka dei ka jingïadei ha ka imlang sahlang para briew. Kata ka jingïadei ka lah ban long na kiba bun ki liang ba lah ban ïa synrop lang ha kawei ka jylli. Kaba kongsan tam eh ka dei ka jingïadei shiïing shisem kum ka tipkur tipkha kaba ym lah lait na manla ka longïing longsem. Ha ka imlang sahlang Khasi ka kur ka dei kawei na ki thana ki ba tehsong tylli mlon ïa baroh ki longiing longsem ha kajuh ka kur bad ka ïaid ryngkat ryngkat bad ki kha ki man ban long pura ïa ki bahaïing na ka liang ka kmie bnad na ka liang u kpa. Wat lada ka iktiar longkñi ka la nang synjor hynrei dang byllai ki longïing longsem Khasi kiba dang tip ban burom ïa la ki kñi kiba don ka jingkitkhlieh ïa la ki hynmen para ki khun ki pyrsa. Ka long kumta ba u kpa u ba lah uba ïai ïa la ka tnga bad ki khun bunsien u dei u kñi uba kit u ba bah ïa la ki hynmen para bad ki pyrsa ha la ïingkur. Kito kiba shah sloit ka iktiar longkñi ki dei kiba syntan hi na lade bad bunsien ki dei hi ruh kiba khlem lah ban bsa thikna wat ïa la ka tnga bad ki khun ki kti. Dei na ka daw ba jyllei kum kita ki shynrang briew ki ba ngop ha ki kam awria, ha ka bam ka dih sngewbha ban pynhun ïa la ka met lajong ba sa synjor ka lyngkor ban kit ïa la ka longïing longsem lada ha ïing khun ne ha ïing kur. Na ka daw jong ki jait briew kiba kum kita shah thadrong ka jaitbynriew shityllup bad shah kynnoh laiphew jait ka imlang sahlang Khasi. Kane ka juh ka rukom ka long lang wat ha ki kynthei ruh ba don katto katne ki ba awria, kiba beh ïa ka rongphong pyrthei bad lapmiet ha ka sngewbha ban hun shimet ïa lade haduh ba shah kynnoh la jan baroh ki kynthei ha ka imlang sahlang.
