New Delhi, Jymmang:
Kumba ka jingmih jong ka elekshon ka pynthikna ïa ka jingjop ïa ka kynhun UDF ba la ïalam da ka seng Congress ha Kerala, ki nong Malayali kiba sah ha katei ka nongbah ki la pdiang sngewbha ïa katei ka jingbthah. Ki seng bad ki riew shimet jong ki Malayali ha ka nongbah ki la ong ba ka jingmih sa shisien ka pynshisha ba ka jingkylla ha ka saiñ pyrthei ka ju jia ha ka jylla man ka por.
Kumba 7-8 lak ngut ki nong Malaya ki shong ha Delhi bad ki nongbah ba marjan jong ka, bad bun na ki ki la leit sha ka jylla trai jong ki ban pyndonkam ïa ka hok jong ki.
Haba pdiang sngewbha ïa ka jingjop jong ka seng Congress, ki la ong ba ka jingmih ka long katkum ka jingkhmih lynti, namar ba ka LDF ka la pyndep ïa ka samoi treikam kaba 10 snem bad ka jingkylla ka la kylla long kaba ym lah ban kiar.
Ki la bynrap ba baroh ar ki UDF bad LDF ki ïajan mar katjuh bad ki briew na ka jylla kiba sah ha ka nongbah, namar baroh ar ki la noh synñiang sha ka roi ka par jong ka Kerala.
Kumta, ki la ong, ïa ka jingkylla nongap ym dei ban pule jylliew than. U K Raghunath, president jong ka Delhi Malayalee Association, u la ong ba ka sorkar Congress ba la ïalam da ka Sheila Dikshit ha Delhi ka la leh ïa ki kam kiba khraw na ka bynta ki briew na Kerala kiba shong ba sah ha kane ka nongbah na ka bynta ka kamai kajih.
U la ong ba ki nongïalam jong ka seng ha ka jingmut kaba kyllum ki la ïai iajan bad ki nong South India, bad kumta bun ki la sngewkmen ïa ka jingmih jong ka jingthep vote.
“Lada ngi kren shaphang ka jingtei ïa ki temple, ban pynthikna ïa ki jingdonkam ba kongsan, bad ban pynsuk ïa ki briew kiba wan na ka jylla, ka sorkar Congress ba la ïalam da ka Sheila Dikshit ka ju ïeng hajan jong ki. Ka jinglong kaba kum kane la ïohi ha Kerala hapoh ki sorkar Congress ba mynshuwa, kiba la leh ïa ki kam kiba khraw na ka bynta ka jingbha jong ki paidbah,” u la ong.
U KK Tony, uba dei u trai jylla Kerala uba sah ha Karol Bagh, u la ong ba ka sorkar LDF ruh ka la leh ïa ki kam kiba bha hapoh ka jingïalam jong u Myntri Rangbah u Pinarayi Vijayan, hynrei ki don ki nongbud ka seng ki bym sngewhun ha ki kyrdan ba hapoh.
U la ong ba da ka jingkylla nongap, ka Congress ka la mih kum ka jingjied kaba tynrai. “Namar ba ka BJP kam don ka nongrim kaba skhem ha kane ka jylla, ka Congress ka dei ka lad kaba lah ban long.Ngi ngeit ba ka seng kan dang ïai bteng ban kyrshan ïa ki briew kiba sah shabar ka jylla Kerala”, u la ong shuh shuh.
U Johny, uwei pat u trai shnong na Kerala uba sah ha ka bynta ba shaphang Shathie jong ka Delhi, u la ong ba ki nongthep vote ha kane ka jylla ki jied da kaba tip bha haba ki jied ïa ka sorkar bad ki nongmihkhmat jong ki.
“Ka Kerala ka dei ka jylla kaba la nang la stad bha, bad ki sorkar ki treikam katkum kane.Ngi ngeit ba kano kano ka sorkar hangtei kan trei na ka bynta ka jingbha jong ki Malaya” u la ong shuh shuh.
