Bengaluru, Jymmang:
U Myntri ka tnat Railways jong ka sorkar pdeng bad ka Jal Shakti u V Somanna ha ka sngi Ba-ar u la kynthoh jur ïa ki seng ka liang pyrshah, da kaba ong ba kito kiba pyrshah ïa ka Women’s Reservation Bill ki la shah ai jingsneng ha ki nongthep vote kynthei ha ka elekshon dorbar thaw aiñ ba dang shen.
Haba kren ha ka jingïalang bad ki nongthoh khubor, u la ong ba ki seng kum ka Trinamool Congress (TMC), ka Dravida Munnetra Kazhagam (DMK) bad ka Left ki la iehnoh ïa ka jingpynkupbor ïa ki kynthei da kaba pyrshah ïa ka aiñ ba la wanrah ban pynkhlaiñ ïa ka ‘Nari Shakti’.
U Somanna u ai khublei ïa u Myntri Rangbahduh ka ri u Narendra Modi uba la pynkhih ïa ka Women’s Reservation Bill bad ong ba ki nongthep vote ki kyntait ïa ki seng kiba ïeng pyrshah ïa ka. U la kam ba ka jingtrei borbah jong ka BJP ha West Bengal ka pynpaw ïa ka jingbym sngewhun jong ki paidbah ïa ka jingsynshar jong ka Myntri Rangbah ka Mamata Banerjee, kynthup halor ka jingshngaiñ jong ki kynthei.
