Amaravati, Jymmang:
Ki pulit jong ka Anantapur distrik ki la lap ïa kawei ka International Online Gaming bad ki jingïathong ha ka Cricket beaiñ kaba la kynnoh ba la pyntreikam na Philippines bad ki la kem ïa 10 ngut ki briew ha ka nongbah Kalyanadurgam, ong u Superintendent of Police u P Jagadeesh ha ka sngi Ba-ar.
Kine kiba la shah kynnoh ki dei kiba la tip kyrteng kum Talari Madhu, Veparalla Mohammed ba la tip ruh da ka kyrteng sin kum u Moula, Shaik Babjan, Shaik Roshan Vali, Makodiki Srinivasulu, Thimmayya, Raghavendra Pavan Kumar, Sunkaravaina Kiran, Rapaka Prashanth bad Gaddavalasa Manikantha Raja na AP bad Telangana.
Ki pulit ki la ïathuh ba arngut ki snar kiba shah kynnoh, u Sachin na Karnataka bad u Shiva, ïa kiba la ngeit ba ki treikam na Philippines, ki dang phet rieh.
Ki pulit ki la ïoh ban kurup ïa ka pisa kaba T. 19.70 lak, kawei ka kali Mahindra XUV 700, saw tylli ki thuk thuk, lai tylli ki laptop, kawei ka tablet, 15 tylli ki mobile phone, 15 tylli ki sim card, 13 tylli ki ATM card, ki Cheque book, ki scanner, ki pen drive, ki card reader bad ki tiar pynbna kiba ïadei bad ka app “Dream Play 1”.
Ki heh sorkar ki la khang ruh ïa ka pisa kaba T. 18.20 lak ha ki khyndai tylli ki bank account, kaba la pynpoi ïa ka dor baroh jong ki mar ba la kurup bad khang sha ka T. 60 lak eiei.
Kat kum ka jingong jong ki pulit, la kynnoh ba u Shiva u la pynïaid ïa katei ka jingïalehkai ba beaiñ Makati ha Metro Manila lyngba katei ka aplikeshon, kaba la pynsuk ïa ki jingïalehkai online Casino beaiñ bad ka jingïalehkai kriket ha kine ki san snem ba la leit.
Ki nongtohkit ki la lap ba ka Talari Madhu ka la ïakynduh ïa u Shiva lyngba ka Instagram bad ka la pynïaid beit ïa ki kam ha ka thaiñ. La kynnoh ba kane ka kynhun runar ka la lum ïa ki bank account jong ki nongpynkheiñ aiñ, ki passbook bad ki sim card na jan 70 ngut ki briew da kaba siew mar T.10,000.
Ki pulit ki la ïathuh ba ïa ki tiar la pynpoi lyngba ki paralok jong ka Delhi bad la phah sha Philippines da kaba buhrieh ha ki mar kit mar.
Da kaba pyntreikam katkum ki jingtip ba la lum ha ka por ba ïalehkai ka IPL, ki pulit ki la leit ban khynra ïa katei ka jaka ha ka 4 tarik u Jymmang bad kem ïa kiba shah kynnoh katba ki dang ïalehkai Online.
