Kolkata, Jymmang:
Ki la don baroh kumba 200 tylli ki jingujor ejahar bad la kem haduh 433 ngut ha kaba ïadei bad ki jingjia ïakynad hadien ka jingthep vote ha West Bengal naduh ba la pynbna ïa ki nongjop ha ka jingïakhun ïa ka elekshon sha ka ïingdorbar thawaiñ kaba dang shu kut ha ka 4 tarik, Jymmang, ong u Director General of Police (DGP) u Siddh Nath Gupta ha ka sngi Balang.
Shuh shuh la ong ba nalor ki 433 ngut kiba la shah kem namar ka jingdonkti ha ki kam thombor hadien ka jingthep vote, u DGP u la ïathuh ba haduh mynta ki don 1,100 ngut kiba la shah buh hapoh ka jingshah set phatok ban ïada bad khanglad ïa ki jingïakynad. .
Kane ka jingkren jong u DGP ka long hadien shisngi ba ka Election Commission of India (ECI) ka la bthah ïa u Chief Secretary ka West Bengal, u Director General of Police bad ïa ki CAPF ba la pyntrei ha kane ka jylla ba kin pynthikna ha ka ban khanglad ïa ki jingïakynad ki ban mih hadien ka elekshon.
U la pynshai ruh halor ka jingweng noh ïa ki katto katne ki jingpynbeit ban ai jingïada na shabar jong ki ïing sah bad ki ophis treikam jong ka Myntri Rangbah ban sa mih noh jong ka jylla ka Mamata Banerjee bad jong u National General Secretary jong ka Trinamool Congress bad ruh u dkhot jong ka seng ha Lok Sabha u Abhishek Banerjee.
