Kolkata, Jymmang:
Ka jingkulmar bajur ka la mih ha ki bynta jong ka North 24 Parganas distrik jong ka West Bengal bad ki pulit ki la pynjur ïa ki jingpahara jong ki shipai bad ki pulit ha kane ka thaiñ ha ka step jong ka sngi Palei, shisngi hadien ba u nongïarap bajan jong u nongïalam ka BJP u Suvendu Adhikari u la shah siat ïap, ong uwei u heh pulit.
Hadien kane ka jingjia, la pyntreikam shuh shuh ïa ki pulit ha Madhyamgram, Doharia bad ki jaka ba marjan, hadien ba ki nongkyrshan jong ka BJP, ki la pynlong ïa ki jingïakhih, da kaba dawa ban kem mardor ïa ki nongthombor.
Hynrei ki heh pulit ki la kyrpad ïa ki paidbah ban pynneh ïa ka jingsuk.
“Ngi dang pynlong ïa ka jingpahara kaba khlaiñ ha ki jaka ba kham ap jingma, bad la pynjari ïa ki bor pahara ba kham bun. Ki briew kim dei ban sngap ïa ki khubor lamler,” la ong uwei u heh ophisar jong ki pulit ka West Bengal ha ka jingïakren bad ki nongthoh khubor.
U nongïarap ba jan jong u Adhikari, ïa uba la tip kyrteng kum u Chandranath Rath, u la shah siat ïap ha ka miet jong ka sngi Balang ha North 24 Parganas distrik ha kaba ka BJP ka la batai kum ka “jingpynïap ba la thmu lypa”, kaba la pynmih ïa ka jingbitar, ki jingïakhih bad ki jingkynnoh ba thymmai halor ka jingïakynad saiñ hima sima.
Katkum ka jingtip ba la ïohlum hashwa, la ong ba u Rath u la shah bat hajan Doltala ha Madhyamgram ha ka por kumba 10.30 baje mynmiet ha ki riew thombor kiba shong da ki thuk thuk kiba la bud ïa ka kali jong u, ha kaba kane ka kali ka la hap ban sangeh bad ki la siat ïa u hashwa ba kin phet krad.
“Ngi kwah ban kem ïa ki nongpynïap briew. U Rath, uba ïaid ha ka kali kaba don jingïadei bad u nongïalam ka liang pyrshah, u la shah siat ïap. Kane kam dei kaei kaei hynrei ka jingpynïap briew kaba la thmu. Ki briew ki tieng,” la ong uwei u nongbud ka seng BJP na kane ka thaiñ.
Uwei pat u nongkyrshan jong ka seng u la kynnoh ba “ki nongleh kam sniew ki treikam khlem tieng” bad u la dawa ban tohkit da ka tnad pdeng.
Ki heh pulit jong ka District ki la ïathuh ba ki jingkhynra ki dang ïaid ha kiba bun ki jaka bad dang khmih bniah ïa ki dur CCTV na ki jaka ba marjan ban ithuh ïa ki nongleh kam sniew.
“Yn ym don mano mano ruh ban lait. Ka jingtohkit ka dang ïaid shakhmat katkum ka jingdonkam ba kongsan,” la ong u heh pulit.
Ar sngi hadien ba la pynbna ïa ki nongjop na ka jingthep vote kaba la ïakhun tyngeh bha, kane ka jingshah pynïap ka la wanrah ïa ka jingkyndit lyngba ki kynhun saiñ pyrthei jong ka Bengal, ha kaba ka BJP ka la kynnoh ïa ka TMC ba ka la pynmih ïa ki jingleh donbor ban thombor beiñ bad kaba hadien ka la pyrshah da ki jingkynnoh ba ka la thombor ïa la ki jong ki nongbud ha kylleng ki distrik.
