Chennai, Jymmang:
U khlur ak phlim ba paw uba na shaphang Shathie jong ka ri uba la rung bad mihkhmat ha ka kam saiñ pyrthei u la pynjur ïa ka jingwad paralok bad pan jingkyrshan na ka bynta ka kynhun synrop jong ki seng saiñ pyrthei hadien ba u la ïoh ïa ka jingbthah kaba jur bha ha ka elekshon ha Tamil Nadu kaba la long ha u bnai ba la dep.
U aktor Vijay, uba dei u khlieh jong ka seng Tamilaga Vettri Kazhagam kaba dang shu mih thymmai, u la thoh sha u heh jong ka Viduthalai Chiruthaigal Katchi (VCK) u Thol Thirumavalan na ka bynta ka jingkyrshan jong u ban thaw ïa ka sorkar ban wan ha ka jylla Tamil Nadu.
Ki nongïalam ka seng VCK ki ong ba ki dang ïathir halor kane ka jingkyrpad bad haduh mynta kim pat shim ïa ka rai.
U Vijay u la leit ïakren sha kiwei pat ki seng ba la ïatreilang bad ka DMK, ka Congress, ka CPI bad ka CPM na ka bynta ka jingkyrshan jong ki.
Ka Congress, kaba don san tylli ki seat, ka la dep ban rai ban kyrshan ïa u Vijay, lada u thaw ïa ka sorkar, la pynthikna uwei u nongïalam.
Lada ka VCK (2), ka CPI (2) bad ka CPM (2), ruh ki mynjur ban kyrshan ïa u Vijay, ka TVK kan ïoh ïa ka jingkyrshan jong ki 119 ngut ki MLA, uwei u la palat ïa ka shiteng lynti.
Ha ka elekshon jylla kaba la long ha u bnai ba la dep, ka TVK ka la paw kum ka seng kaba marwei kaba heh tam ha ka ïingdorbar jong ka Tamil Nadu, ha kaba ka la aiti ïa ka jingshah rem kaba jur ha ka DMK kaba synshar ha ka jingïalam jong u MK Stalin.
Ka seng kaba la ïalam da u Vijay ka la jop 108 tylli na ki 234 tylli ki seat jong ka jylla, tang 10 tylli ki seat kiba duna ïa ka dak kaba shiteng.
Ka DMK ka la hiar sha ka tang 59 seat katba ka AIADMK ka la lah ban jop 47 seat.
U Vijay u la ïakhun ïa ki ar tylli ki Seat kata ka Trichy East bad ka Perambur. U la jop ïa baroh ar.
Ki tyllong khubor ki ïathuh ba u lah ban iehnoh ïa ka Trichy East bad bat ïa kane kaba hadien. Lada jia kumta, kan bud sa ka ilekshon shiteng samoi ha ka jaka ba lait.
