Thiruvananthapuram:
Haba ai khublei ïa ki nongïalam ka UDF na ka bynta ka jingjop kaba khraw jong ka kynhun ha ka elekshon dorbar thawaiñ, ki heh jong ka NSS bad ka SNDP Yogam ki la pynpaw ba kim kyrshan ïa uno uno u kyrtong kyrpang na ka bynta ka kam Myntri Rangbah bad ba kin neh ha kane ka mat.
U General Secretary jong ka SNDP Yogam, u Vellappally Natesan, u la ïathuh ha ki lad pathai khubor ha Alappuzha ha ka sngi Balang ba baroh lai ngut ki nongïalam ka Congress kiba don ha ka jingïakhun ban long Myntri Rangbah ka Kerala ban wan ki long kiba lah bad ka rai halor ka jinglong nongïalam ha kaba kut ka shong ha ki heh jong ka Congress.
Haba pynksan ïa ka jinglong pdeng, u General Secretary ka NSS u G Sukumaran Nair u la ong ba ka seng kan ym tyrwa ïa kano kano ka kyrteng na ka bynta katei ka kyrdan ba hakhliehduh.
“Ka NSS kam don jingeh bad mano mano ba shimti ïa ka kam Myntri Rangbah ka jylla. Ïa ka kam dei ban pyndap da u briew uba don ka sap bad ka jingshemphang”, la ong u Nair haba ïakren bad ki lad pathai khubor ha Perunna.
Haba kynthoh halor ka jinglah jong u V D Satheesan ban bat ïa ka shuki ba hakhliehduh, u Nair u la byrngem byrsit, “Hato kam dei ka rai jong ka Congress? Hato ym dei ban pdiang ïa ka?”
Hynrei u la pynkynmaw ba ki don ki riew shimet hapoh ka seng kiba kham rangbah ban ïa u Satheesan. U Nair u la pynshai ba ki jingbym iïsngewthuh jingmut jong u bad u Satheesan halor ka jinglong jong une u Satheesan halor ki katto katne ki mat ki dang don bad ba un kyrpad ïa u ban pynbeit ïa ki.
Halor ka jingjop jong ka UDF, u Nair u la ong ba kam dei na ka jingpyrshang jong uno uno u briew shimet.”Ka dei ka jingpynpaw ïa ka jingkwah jong ki paidbah ïa ka jingkylla hadien ba ki la sngewsih ïa ka sorkar kaba mynta.”
U la batai ruh ïa ka jingmih jong ka elekshon kum “ka jingjop na ka bynta ka synshar paidbah”, da kaba pynskhem ba ka jingshah rem jong ka Left ka dei namar ki jingeh hapoh ym namar ki jingsngew pyrshah ïa ka jingsynshar.
Ha kaba ïadei bad ki lad ba u General Secretary jong ka AICC u K C Venugopal un shimti ïa ka shuki Myntri Rangbah ka jylla u la ong: “Ai ba ka Congress kan rai;
Haba ai jingïaroh ïa ki lai ngut kiba ïakhun ïa ka kam Myntri Rangbah, u Vellappally u la ong ba baroh ki dei ki nongïalam kiba dei hok.
“Ka jingleh jong u Satheesan ka long kaba itynnad bha kum u nongïalam ka liang pyrshah. Ka Muslim League ruh ka kyrshan ïa u”, la ong u Vellappally. “U Venugopal u dei u nongïalam uba don ka sap kaba khraw bad uba don ka bor. U dei uwei na ki nongïalam ba hakhliehduh jong ka seng, hadien ka Sonia Gandhi bad ka president jong ka seng”, la ong u Vellappally.
Haba ai khublei ïa u Venugopal na ka bynta ka jingjop kaba khraw jong ka UDF, u la pynkynmaw ba u Venugopal u la don ka bynta kaba kongsan ha ka jingjied ïa ki kyrtong, ban pynbeit ïa ki jingïakynad hapoh ka UDF, bad ban lum ïa ki lad jingïarap. “Ka jingai pisa ka dei kaba kongsan ha ka elekshon bad u Venugopal u la long u nongkitkam ban pynthikna ïa ka jingkyrshan ïa ki kyrtong ka Congress.U lah ban synshar ïa ka jylla wat haba u don ha Delhi”, la ong u Vellappally.
Haba ai jingïaroh ïa u nongïalam ba rangbah u Ramesh Chennithala, u Vellappally u la pynpaw ïa ka jingshemphang jong u, ka jingtbit ha ka rukom synshar, bad ka jinglah ban pynïatylli ïa ki nongïalam ha kylleng ki kynhun.
Shuh shuh, u heh ka SNDP Yogam u la khot ïa u General Secretary ka IUML u P K Kunhalikutty kum u nongïalam uba pdeng bad uba la pdiang paidbah uba la ïoh vote ha kylleng ki jaitbynriew. Hynrei u la kynthoh ïa ka jinglong ba pynpait pynpra jong u nongïalam ka IUML u K M Shaji.
