Bengaluru, Jymmang:
Da ka jingshah rem jong ka LDF ha ka elekshon sha ka Ïing dorbar thawaiñ jong ka Kerala bad ka jingiehnohkam jong u Pinarayi Vijayan, uba la 80 snem ka rta, kum u Myntri Rangbah jong ka Jylla, u Myntri Rangbah jong ka Karnataka, u Siddaramaiah, uba 78 snem ka rta, u la kylla long mynta u Myntri Rangbah ka jylla uba la kham noh ka rta ha ka ban shakri ïa ka kam kum u Myntri Rangbah ha ka ri.
Kiwei kiba don ha ka thup jong ka jingbuh kyrteng kum kiba la kham noh ka rta ki long u Myntri Rangbah ka Andhra Pradesh u N Chandrababu Naidu (75), bad u Myntri Rangbah ka Mizoram u Lalduhoma bad u Myntri Rangbah ka Nagaland u Neiphiu Rio kiba la don 74 snem ka rta.
U Myntri Rangbah jong ka Arunachal Pradesh u Pema Khandu u la long u Myntri Rangbah ba khynnah tam ha ka ri ha ka rta kaba 46.
U Siddaramaiah u la long MLA nyngkong eh ha u snem 1983, ha ka rta kaba 36.
Naduh katei ka por u la bat bun tylli ki kam, kynthup kum u Myntri, kum u LoP, bad mynta u la long Myntri Rangbah la arsien.
U don ruh ïa ka rekod ban leit rah ïa ki 17 tylli ki mang tyngka jong ka jylla.
Mynta u Siddaramaiah u la kylla long u Myntri Rangbah jong ka Karnataka uba la slem tam ha kaba u la tam ïa ka rekod jong u D Devaraj Urs.
U Urs u la bat ïa katei ka kam ar samoi bad u la bat ïa katei ka kam haduh 7 snem bad 239 sngi.
U Siddaramaiah, u la bat ïa katei ka shuki, naduh u bnai Jymmang 2023, hadien ba u la bat pura ïa katei ka shuki, hapdeng u snem 2013 bad 2018.
Mynta u Siddaramaiah u la dap 78 snem bad khyndai bnai. Ym pat don uwei pat u briew uba la bat ïa ka kyrdan ba ha khliehduh ha Karnataka ha kane ka rta.
Ha ka por ba u riew khlaiñ jong ka BJP u BS Yediyurappa u la iehnoh ïa ka kam Myntri Rangbah ha u bnai Naitung, 2021, u la dap 78 snem bad san bnai ka rta.
Katba u SM Krishna u la don 72 snem ha ka por ba u iehnoh kam ha u snem 2004, u JH Patel bad u Dharam Singh ki la don 69 snem.
U R Gundu Rao u la long u Myntri Rangbah ba khynnah tam ha ka rta kaba 43 snem haba u la shim smai ha u snem 1980.
