New Delhi, Jymmang:
Ka Delhi ka la ïoh jingtip ba ki don haduh 1,267 tylli ki kam runar pyrshah ïa ki briew ba la noh ka rta (kiba la palat ïa ka 60 snem) ha u snem 2024, kaba long kaba bun tam napdeng ki 19 tylli ki nongbah ba heh.
Kane ka jingkheiñ ka pyni ruh ïa ka jinghiar khyndiat na ki 1,361 tylli ki jingjia ha u snem ba ladep bad 1,313 tylli ha u snem 2022, katkum ka jingkheiñ jong ka National Crime Records Bureau (NCRB).
Napdeng ki nongbah baheh, ka nongbah jong ka ri la bud sa ka Mumbai kaba don 791 tylli ki jingjia bad ka Bengaluru kaba don 660 tylli ki jingjia.
Napdeng kine ki mukotduma ha Delhi, ki don ar tylli ki jingshah leh beijot, 20 tylli ki jingshah thombor ne pyndonkam da ka bor da ka jingthmu ban pynbitar ïa ka jinglong rit paid, ar tylli ki jingshah jrong kti, 15 tylli ki jingpynïap, lai tylli ki jingthmu pynïap bad saw tylli ki jingrahbor. Ka jingtip ka pyni shuh shuh ba 385 tylli ki mukotduma ki dei kiba ïadei bad ka jingtuh, 53 tylli ki jinglute, 14 tylli ki jingshah dawa pisa, 31 tylli ki jingtuh, 227 tylli ki jingleh thok, shukor bad 12 tylli ki kam runar.
Ha u snem ba la dep, kane ka kot khubor ka la pynpaw ba ki pulit jong ka Delhi ki la pynrung kyrteng palat 7 hajar ngut ki tymmen thymmai haduh u bnai Nailur, kaba pynlong ïa ka jingdon jong ki sha ka 56,981 ngut ha kylleng ka nongbah jong ka ri.
Ki pulit ki dang thmu ruh ban pynrung ïa ka aplikeshon ba la pynthymmai na ka bynta ki riew rangbah ban buddien ïa ki jingleit jngoh jong ki ophisar beat bad ban pynbha ïa ka jingpynbeit ïa ki jingeh.
Katkum ka jingïathuh jong ki pulit, ïa ka Cell pahara jong ki tymmen ha ka jaka treikam jong ki pulit la seng ha ka 22 tarik, Jylliew, 2004. Katba ki skhim jong ki tymmen ki la don lypa ha ka kyrdan distrik, la rai ban thaw ïa ka Cell pdeng jong ka PHQ kaba ïadei bad baroh ki kam runar hapoh ka ka jingshngaiñ jong ki nongshong shnong ha ka nongbah.
