Chennai, Jymmang:
U nongïalam ka liang pyrshah u R Ashoka u la ong ba ka rong ba shisha jong ka Congress ka la paw hadien ba ka la ïasoh bad ka TVK jong u Vijay ha Tamil Nadu, da kaba weng noh ïa ka seng ba la ïatreilang bad ka la slem bha, ka DMK. “Mynta kano kano ka seng kaba kwah ban don ka jingïatehlok bad ka Congress ka donkam ban pyrkhat thymmai”, la ong u Ashoka.
Ka Congress ka la rung ha ka jingïateh lok bad ka TVK, da kaba pynpra noh ïa ka jingïateh lok jong ka bad ka DMK hashwa ka jingthep vote. Haba kren ha ki nongthoh khubor ha ka taïew ba la lah, u Ashoka u la ong, “Ka DMK ka la shah rem ha ka jingïakhun ïa ka elekshon. Ka Congress kam shym la pynlut por ban ïasnohkti lang bad ka TVK. Ka Congress kam don jingmut ei ei. Ka Congress ka la pynduh ïa ka jingshaniah jong ka DMK… dei na kata ka daw ba ki briew kim shaniah shuh ïa ka Congress.”
Kiba don ha ka kynhun INDIA bad kiwei kiba kwah ban ïasnoh kti lang bad ka Congress mynta ki donkam ban pyrkhat thymmai, u la ong. “Ka Congress ka la pynmong ïa ka DMK. Hadien ka jingshet kylla, ka DMK mynta ka la sah marwei”, la ong u nongïalam ka BJP bad bynrap ba ka Congress mynta ka la sdien ha ka seng kaba jop ha ka jingïakhun elekshon.
