Bhubaneswar, Jymmang:
Ka BJD ka la sdang ïa ka Campaign ‘Nari Adhikar Abhijan’, ha kaba ka la pan ïa ka jingpynsah kyrpang 33 percent na ka bynta ki kynthei ha ki shuki Lok Sabha bad Assembly da kaba pynïakhlad ïa ka jingbuh kyrpang jong ki na ka jingpynbeit pud. Ïa kane ka jingïalap paidbah la pynlong ha baroh ki 147 tylli ki Assembly konstitwensi ka ban kut haduh ka 25 tarik u Jymmang.
U President ka seng bad nongïalam ka liang pyrshah u Naveen Patnaik u la sdang da kaba sdang ïa kane ka jingïalap naduh ka sngi U Blei bad kaba dang ïai bteng haduh mynta. Haba kren ha ka jingïalang kaba la long ha katei ka sngi, u Naveen u la ong ba mynta dei ban ai ïa ka bhah ba la mang na ka bynta ki kynthei katkum ka jingdon jong ki shuki Lok Sabha mynta khlem da pynïadei bad ka Delimitation Bill. “Ka BJD ka la kyrshan pura ha u snem 2023 ïa ka aiñ pynneh pynsah ïa ki kynthei,” u la bynrap.
Haba wan hiar thma jur halor kane ka mat, u Naveen u la ong ba ka BJD ka la ïaleh beit ban pynthikna ïa ka hok jong ki kynthei bad kan dang ïai bteng ban leh kumta ha ki por ban wan ruh kumjuh. Haba pynpaw ba ka jingkiew jong ki kam thombor ïa ki kynthei ha Odisha ha kine ki khyndiat snem ba la dep ka long kaba sngewkhia haduh katta katta, ka LoP ka la ong ba ka BJD ka rah shakhmat ïa ka jingïakhih ba la sdang da u Myntri Rangbah barim ka jylla u Biju Patnaik ban pynkup bor ïa ki kynthei.
Haba ïadei bad ka jingshah pynïap jong kawei ka longkmie kaba armet dang shen ha Hinjili hakhmat u khun ba dang lai snem ka rta, u Naveen u la ong ba ki kynthei ki la nang sngew artatien halor ka jingbym shngain bad ki shah pynduh ban ïoh ïa ka hok jong ki hapoh ka sorkar BJP.
“U Biju babu u la don ka histori ban pyntreikam ïa ka jingbuh kyrpang ïa ki kynthei 33 percent ha ki jaka pule Panchayati Raj ïa kaba la pynkiew sha ka 50 percent hapoh ka sorkar BJD”, la ong u president ka seng.
Haba pynpaw ba ka BJD ka la ai 33 pc ïa ki kynthei ha ka elekshon Lok Sabha 2019 bad 2024, u la ong, “Ki lieng thylli mynta ki pynmih jingsawa bha.” Ki briew ki bym shym la leh ei ei na ka bynta ki kynthei mynta ki pynmih ïa ki jingdawa kiba heh, u la bynrap.
Ka President jong ka Biju Mahila Janata Dal ka Snehangini Chhuria bad kiwei kiwei ki nongïalam ka kynhun ki kynthei ki la thong ruh ïa ka sorkar halor ka jingkiew ki kam sniew pyrshah ïa ki kynthei ha kane ka jylla.
