Bhubaneswar, Jymmang:
Naba jur ka jingshah kynthoh halor ka jinglong jingman jong ka aiñ ka suk ka saiñ ha ka jylla kaba nang sniew katba nangmih ki sngi, ha kaba u Myntri Rangbah ka Jylla u Mohan Charan Majhi u la byrthen ïa ki pulit namar ka jingleh lyndet jong ki ban tehlakam ïa ki kam runar, u DGP YB Khurania ha ka sngi U Blei u la poi ha ka jingïapyninia bad ki heh ophisar.
Haba khot ïa ka jingïalang ba kyrkieh hangne, u DGP u la kyrpad ïa ki ban pynjur ïa ka jingpyntreikam bad ban pynthikna ban pynkloi ha ka ban leh da kaba tyngeh pyrshah ïa ki kam runar ha kylleng ki distrik.
U la bthah ïa ki pulit ban pynjur ïa ka jingpahara beit ban pynbun ïa ka jingleit jngoh ïa ki jaka ba hap hapoh ka jingpeit jong ki bad ban don ka jingïatreilang kaba radbah bad ki nongshong shnong. Kane kan ïarap ym tang ban ïada na ki kam runar hynrei kan ïarap ruh ban lum jingtip, u la ong.
U Khurania u la bthah ruh ïa ki SP jong ki distrik ba kin pynlong ïa ka jingïaid pahara man ka por ha baroh ki jaka treikam jong ki pulit jong ka jylla shwa ka por 9 baje mynstep man ka sngi. U la bthah ïa ki ban pynthikna ïa ka jingbud ryntih jong ka bad ban buddien man ka por.
Ka jingpynbna paidbah ne ka jingkhot kyrteng jong ki pulit ka pynthikna ïa ka jinglong ba la pynkhreh bad pynneh ïa ka jinglong ryntih ha ka jingtreikam, u la ong.
Hadien ka jingkhot kyrteng, la bthah ïa ki ophisar jong ki thanat ban bishar bniah bad ban ïakren va ka jinglong jingman jong ka aiñ ha la ki jong ki jong ki jaka, ban buddien ïa ka jingtohkit ïa ki kam kiba khia bad ban buddien ïa ka jingleit jingwan jong ki nongleh kam sniew kiba ju leh.
U la pynksan ruh ban pynkiew ïa ka jingshai jong ki pulit bad ban ai jinghikai ïa ki pulit jong ka Emergency Response Support System (ERSS) dial – 112.
Ka jinghikai ïa baroh ki pulit kiba trei ha ki kali ai jingïarap kyrkieh kan kyntiew ïa ka jingtreikam bad ka jinglah jong ki ban jubab ha ki jingjia kiba eh bad kiba kyrkieh, u la ong.
Kane ka jingbthah jong u DGP ka long hadien ba ki nongtrei jong kawei ka kali ERSS ki la leit jurip ïa ka thaiñ Ramachandrapur hapoh u pud u sam jong ki pulit ka Balianta ha ka 7 tarik, u Jymmang ha kaba u pulit ka GRP u Soumya Ranjan Swain u la shah thombor ha ki paidbhur hynrei kim shym la lah satia ban pyllait im ïa u.
Ki la mareh sha ka jaka ba jia katei ka jingjia hynrei la ïathuh ba ki la pynslem ban ïakynduh ïa ki rangbah jong ki ban pyntip ïa ki shaphang ka jinglong jingman kaba sniew, kaba la pynlong ïa u Swain ban khlad noh.
Hapdeng ka jingkiew jong ki kam runar, u Khurania u la kyrpad ruh ïa ki ophisar ba rangbah ban pynlong ïa ka jingïakhih ba kyrpang kaba 15 sngi ha kylleng ka jylla kaba la sdang naduh ka lah sngi U Blei ban kem ïa kiba shah kynnoh donkti bad kiba la phet rieh ïalade na ki kti jong ka aiñ, ban pyntreikam ïa ki hukum ba dang sahkut bad ban sdang ïa ki kam kiba tyngeh pyrshah ïa ki nongleh kam sniew kiba pawnam bad kumjuh ruh ïa ki nongkhaïi drok.
