Lucknow, Jymmang:
Ki la don kumba 100 ngut ki briew ki la ïap hadien ba ka jingkhie jong ka lyer, u slap, uba jur, ha ryngkat ka jinghap u phria bad ka leilieh, kine ki jingthombor jong ka mariang ki la jia ha ki katto katne ki District jong ka Uttar Pradesh, ha kaba ki la pynkhyllem ïa ki dieng ki siej bad ki nar pynïeng elektrik bad ki la pynjulor ïa ki ïing ki sem, ong ka khubor jong ka ophis jong u Relief Commissioner.
Ka jingdon jong kiba bun ki briew kiba la ïap, ki la long 21 ngut bad kine ki dei na Prayagraj distrik, katba ha Bhadohi, ki long 17 ngut. Ha Mirzapur, ki don 15 ngut kiba ïap, na ka daw ka jingkhie ka ‘erïong bad ka jingpom pyrthat. Ka Fatehpur, ka ïathuh ba ki don 9 ngut kiba ïap, katba ha Badaun, ki don 6 ngut kiba ïap. Kumba la ïoh jingtip, la ong ba ki la don mar saw ngut kiba ïap, ha Pratapgarh bad Bareilly.
Ha ki 24 kynta ba la leit, la ïathuh ba ka jinghap slap, ka long ha jan 30 tylli ki District, ba kynthup ïa ka Ghaziabad, Varanasi bad ka Ayodhya.
U Myntri Rangbah ka jylla, u Yogi Adityanath, u la shim khia ïa ka jingduh jong ki mynsiem briew bad ki jingjulor, na ka daw jong ka jinglong ka suiñbneng, ha ka sngi Balang bad u la bthah ïa ki heh sorkar, ba kin pynthikna ba ki jingïarap, kin poi sha ki longïing kiba shah ktah hapoh 24 kynta.
Ha ka jingthoh ha ka rynsan X ha ka sngi Palei, ka ophis jong u Relief Commissioner ka la ong, “Namar ka jinglong ka suiñbneng kaba sniew ha ka 13 tarik u Jymmang, kynthup ïa ki ‘erïong, u slap, u phria bad u pyrthat, ki khubor ba la ïap ki long 89 ngut, 53 ngut ki briew kiba mynsaw, 114 ngut ki jingri jingdup bad ki jingjulor ki 87 tylli ki ïing la ïoh pdiang da ka Myntri Rangbah.”
Ka la ong ba u Myntri Rangbah ka jylla u la bthah ïa baroh ki Divisional Commissioner bad ki District Magistrate ban pynshisha ïa ki jingjia “da ka jingsngewthuh kaba pura” bad ban pynthikna ba ïa ka jingïarap pisa la sam sha ki longïing kiba shah ktah hapoh 24 kynta katba dang pynneh ïa ka jingïakren beit bad ki bad pynpoi ïa baroh ki jingïarap ba donkam.
