Panaji, Jymmang:
U nongïalam jong ka seng Congress ha Goa u Ketan Bhatikar, uba dei u khmat jong ka seng dang shen ha ka por ba la pynsangeh ïa ka jingthep vote sha Ponda Assembly Bypoll, u la khlad noh, hadien ba u la shah puh bseiñ, la ïathuh ki pulit ha ka sngi Thohdieng.
Kane ka jingjia ka la jia ha ka miet jong ka sngi Palei, ha kaba u Bhatikar (38 snem) u dang thmu ban leit sha ka shnong Dandeli ha Karnataka.
“U Bhatikar, u la hiar ha Karmal Ghat, ha khappud Goa bad Karnataka, na katto katne ki daw, haba u bseiñ u la puh ïa u. La pynkit ïa u mar mar sha Primary Health Centre ha Dharbandora, Goa, ha kaba ki doktor, ki la pynbna ba u la ïap naduh ka por ba la leit rah ïa u sha ka jaka ai jingsumar,” la ïathuh uwei na ki heh pulit.
U Bhatikar, u dei u kyrtong jong ka seng Congress, na ka bynta ka elekshon shiteng samoi na Ponda, ha kaba la pynsangeh noh, hadien ka rai jong ka ïingbishar ba ha khlieh duh. U la rah sha ka ïingbishar bahakhliehduh ban pyrshah ïa ka hukum jong ka HC lyngba ka Special Leave Petition, kaba dang sahkut ha ka ïingbishar bahakhliehduh.
U nongïalam ka liang pyrshah u Yuri Alemao u la ong ba u dap da ka jingsngewkhia halor ka jingkhlad noh jong u Bhatikar.
“Ka jingshimkhia jong u kaba khlem kynran dien ha ka kam shakri paidbah kan sah jingkynmaw junom. Ka jingsngewlem jong nga sha ka longïing, ki bahaïing hasem bad ki paralok jong u ha kane ka por jong ka jingsngewsih. To ai ba ka mynsiem jong u kan jahthait ha ka jingsuk bymjukut” ong u Alemao.
Ka Goa Pradesh Congress Committee ka la pynkup burom ïa u nongïalam ka seng jong ka bad ka la pynpaw ruh ïa ka jingsngewlem sha ka longïing kaba la duh noh, kumjuh sha ki paralok bad ki nongkyrshan jong u.
Ha ka jingthoh ba la buh ha ka rynsan X, ka la ong, Ngi dap da ka jingsngewsih halor ka jingkhlad noh jong u nongïalam ka seng u Dr Ketan Bhatikar. Ka jingaiti lut jong u kaba khlem artatien, ka jingaiti ha ka jingshakri paidbah, bad ka jingnoh synñiang jong u sha ka seng bad ka imlang sahlang kan sah kynmaw beit da ka jingburom bad jingsngewnguh kaba khraw.” To ai ba ka mynsiem jong u kan jahthait ha ka jingsuk, bad to ai ba ka longïing kan ïohbor ban kit ïa kane ka jingduh kaba ym lah ban pynbiang, la bynrap biang ka GPCC.
