Srinagar, Jymmang:
Ki pulit jong ka Sopore, ki la kurup ïa ka jaka kaba 10 Marla, kaba shong dor kumba T. 20 lak, ha Kehnusa, Bandipora, kaba dei jong u Majid Ahmad Sofi, uba dei u dkhot jong ka kynhun lehnoh Hizbul Mujahideen uba treikam na Pakistan-occupied Kashmir (PoK). Ïa kane ka jaka kaba dei ka jingdon jingem ka bym lah ban pynkhih la pynngat hapoh ka UAPA ha ka FIR 307/2023. Kane ka jingpyntreikam ka thmu ban pynpra ïa ki lad ai pisa ïa ki lehnoh bad ban pynthut ïa ka jingpynpoi mar, ban kyrshan ïa ka jingïakhun pyrshah ïa ki kynhun bad ki kam pyrshah ri ha Jammu & Kashmir.
Ki pulit ki la ïathuh ba u Majid Ahmad Sofi Bisati, u khun jong u Ali Mohammad Sofi, uba shong ba sah ha New Colony Sopore, uba katkum ki jingthoh, u dei u dkhot/nongpynïaid ba trei shitom jong ka kynhun pyntriem kaba la shah ñiew beaiñ ka Hizbul Mujahideen, u la shah kurup ïa ka jaka jong u kaba heh kaba don 10 Marla ha Kehnusa, Bandipora, ha ka dor kaba T. 20 lak.
Ïa kane ka jingkurup, la leh da ki pulit ka Sopore ha ryngkat u Executive Magistrate, ki heh ka Revenue, bad ki nongsakhi ba laitluid hapoh ka mukotduma FIR No 307/2023 ba la mudui hapoh ki kyndon 13, 18, 18B, 20, 23, 38, 39 jong ka Unlawful Activities (Prevention) Act (UAPA), ha ryngkat ki kyndon 7/25 jong ka Arms Act bad 4/5 jong ka Explosive Substances Act.
Kane ka jingpyntreikam ka dei shi bynta jong ka buit kaba kham jylliew bad kaba neh da ki pulit ka J&K ban pynpra ïa ka rukom ai pisa bad jingkyrshan ïa ki kynhun lehnoh kiba treikam na shiliang pud.
Ki pulit jong ka Jammu & Kashmir ki thmu tyngeh ïa ki lad pynpoi mar bad pisa tyngka jong ki nongpynïaid ïa ki kam lehnoh kiba treikam na Pakistan bad ka Kashmir ba la synshar da ka Pakistan, da kaba pynïasoh ïa ki mar ki mata jong ki kiba ym lah ban pynkylla katkum ka aiñ ban pynpra ïa ki jaka treikam ki lehnoh.
Kham hashwa, la shim bun tylli ki kam pyrshah ïa ki nongpynïaid ïa ki kam kiba don ha Pakistan, kynthup ïa ka jingbat palat 10 Kanal ka jaka jong u Abdul Aziz ha Mandi bad ka jaka jong u Rafiq Nai Sultan ha Mendhar, uba la shah kynnoh ba u phah ïa ki lehnoh bad shalan tuh ïa ki jingdih pynbuaid. Bad la pynïasoh ïa ki jaka jong ki nongpynïaid kiba treikam na shiliang khappud, kynthup ïa ki 4 tylli ki Marla ha Tral kiba dei jong u Mubashir Ahmad bad ki jaka kiba heh ha ka thaiñ Uri jong ka Baramulla kiba ïadei bad ki mukotduma pyrshah ïa ki nongleh kam sniew ba la pynbna.
