Thiruvananthapuram:
U V D Satheesan, uba la shahjied ban long u Myntri Rangbah ka jylla Kerala lem bad kiwei pat ki Myntri kin sa bam smai ha ka 18 tarik, Jymmang, ha ka jingïalang ban sa pynïaid ha kane ka sngi.
Ki nongïalam ka ri kin sa khot ïa ki nongïalam na kiwei pat ki jylla na ka bynta kane ka jingleh burom, la ong u Satheesan ha ki nongthoh khubor hadien ba u la leit jngoh ïa ka ïing jong u Myntri Rangbah barim ka jylla u Oommen Chandy hangne ha ka sngi Palei.
“U Rahul Gandhi, ka Priyanka Gandhi bad u Mallikarjun Kharge kin ïadonlang. Ka jingpynbam smai kan long ha ka por 10 baje mynstep jong ka 18 tarik, Jymmang. Baroh ki nongïalam ka Congress kin ïadon lang,” u la ong. Katkum ka jinjingïathuh ki nongïalam ka seng, la ong ba kane ka jingpynsmai kan long ha Central Stadium ha Thiruvananthapuram.
U Satheesan u la ong ba ïa ka rai halor kiwei pat ki Myntri yn sa pynkut noh shen bad ka jingïakren ka la sdang hynnin ka sngi. U la ong ba dei u Chandy uba la ai lad bun eh ïa u ha ki kam Assembly ha ka por ba u long u nongmihkhmat ka Liang Pyrshah naduh u snem 2006 haduh 2011.
“Ka jingduh kaba khraw tam ha ka jingim saiñ pyrthei jong nga kam dei ba ngam shym la long Myntri, hynrei ba ngam lah ban long uwei ha ka sorkar jong u Oommen Chandy,” u la ong. U Satheesan u la ong ba u la kynthoh bunsien ïa u Chandy, hynrei u Myntri Rangbah barim u ju kren beit ïa ki jingeh jong u.
“U long ka jinghikai kaba khraw ïa ngi. Ka jingim jong u ka long ka jingpynkynmaw ba ngim dei ban klet ïa kiba duk wat haba ngi don ïa ki kabu katba ngi dang don ha ka bor. Kan sah beit ha ka dohnud jong nga,” u la ong.
U Satheesan u la ong ba un sa ïakynduh ruh ïa u Myntri Rangbah barim ka jylla u Pinarayi Vijayan hadien ba u la pan ïa ka kam. Ka UDF ba la ïalam da ka Congress ka la jop 102 tylli na ki 140 tylli ki Assembly seat ha ka elekshon ba dang shen ha Kerala.
