New Delhi, Jymmang:
Ka kynhun National Investigation Agency (NIA) ka la pynngat mukotduma ïa san ngut ki briew, kynthup ïa u snar nongïalam, ha ka mukotduma kaba ïadei bad ka jingkhaïi bad ka jingpynlong mraw ïa ki samla India ha ka kor kompiwtor ha Cambodia, la ong ki heh sorkar ha ka sngi Saitjaiñ.
Ïa kane ka mukotduma la mudui hakhmat ka ïingbishar ba kyrpang jong ka kynhun NIA ha Patna ha ka sngi Thohdieng pyrshah ïa uba shah kynnoh nonglamkhmat jong ka kynhun khaïi briew, u Anand Kumar Singh ba la khot sin u Munna Singh, uba dang phet rieh mynta, ryngkat bad saw ngut ki para ba la shah kynnoh donktilang.
Katkum ka jingong jong ka kynhun NIA, ki jingtohkit ki la lap ba u Anand u dei u nongpynïaid ba kongsan jong katei ka kam runar bad u donkti ban pynrung kam ïa ki samla lyngba ki sub-agent bapher bapher bad ki travel agent ha kylleng ka ri India.
Ka kynhun tohkit, ka la ong ba u la trei ha ka jingïatreilang bad ki paralok kiba don ha Cambodia ban khaïi beaiñ ïa ki lanot sha katei ka ri Southeast Asian. U Anand u la buh dor da mar USD 2,000-3,000 ki samla ba shahdei sha ka kompeni thok, ka la ong.
Kiba shah kynnoh ki donkti ha kaba pynngop ïa ki samla India sha Cambodia da kaba ai daw ïa ki kam kiba dei hok bad ki tulop kiba kor, kum shi bynta jong ka kynhun khaïi briew kaba la pynbeit ryntih.
Mar ïapoi ha Cambodia, la kurup ïa ki passport jong ki lanot bad la pynbor ïa ki ban trei na ka bynta ki “kompany thok”, bad kano kano ka jingpyrshah na ka liang jong ki la ïakynduh da ka jingpynshitom beiñ ha ka jingmut jingpyrkhat bad ha ka met, kynthup ïa ka jingshah shoh bad shah kynthah da ka elektrik, ka jingshah set jubor, ka jingbym ai bam bad um bad kiwei kiwei, la ong ka kynhun NIA.
Lai ngut na kiba shah kynnoh kiba kynthup ïa u Abhay Nath Dubey bad u Rohit Yadav, baroh arngut ki dei ki nongshong shnong jong ka Uttar Pradesh bad u Abhiranjan Kumar, uba shong ba sah ha Bihar, ki la shah kem ha u bnai Rymphang jong une u snem ha ka por ba ki poi sha ka nongbah jong ka ri na Cambodia.
Uba san uba la tip kyrteng kum u Prahlad Kumar Singh u la shah pyllait jamin.
Ka jingtohkit ban wad ïa kiwei pat ki dkhot jong katei ka kynhun bad ban sei madan ïa ka jingthmu ba pura ha katei ka kam ka dang ïaid shakhmat, ong ka kyrwoh.
