Kolkata, Jymmang:
Ka sorkar BJP ba la ïalam da u Myntri Rangbah ka jylla u Suvendu Adhikari ha West Bengal ha ka sngi Saitjaiñ ka la pynduh pyndam noh ïa ka Police Welfare Board jong ka jylla, da kaba kynnoh ba ka la leh kum ka “party’s frontal organization” bad ka la donkti ha ki kam be-aiñ.
“Ïa ka Police Welfare Board la thaw da ka jingthmu kaba bha. Hynrei khatduh khatwai, ka la kylla long ka kynhun kaba hakhmat eh jong ka seng. Ngam tip kumno kata ka la ïarap ha ka bha ka miat jong ki pulit, hynrei ka la kylla long ka jaka ban ïoh ïa ka jingpynjlan por be-aiñ (ka kam). Don ki briew kiba la ïoh jingmyntoi shimet. Mynta ngi la khang ïa ka Board,” ong u Myntri Rangbah u Suvendu Adhikari.
Hadien ba u la long u nongpynïaid ïa ka jingïalang bishar bniah ïa ka rukom synshar ha Diamond Harbor ha South 24 Parganas district, u Myntri Rangbah u la pynskhem ba ïa ki jingshah thombor ïa ki pulit yn nym shah ha kano kano ka jinglong bad u la ban jur ïa ka jingdonkam ban pynjari pyrkhing ïa ka aiñ bad ka suk ka saiñ.
