Vijayawada, Jymmang:
Ka jylla Andhra Pradesh ka la paw kum kawei na ki jylla ba pawkhmat ha ka ri ha kaba buh ïa ki jingmudui mukotduma kiba ïadei bad ki khubor lamler bad ki khubor hamsaïa kiba la saphriang lyngba ki rynsan Digital, katkum ka kaiphod ba thymmai jong ka National Crime Records Bureau (NCRB) na ka bynta u snem 2023-24.
Ka jylla ka la ïoh 346 tylli ki jingujor kiba ïadei bad ka jingpynsaphriang ïa ki jingpynbna ba thok bad ki khubor lamler ha u snem 2023-24, kaba wan ha ka kyrdan kaba ar ha ka ri hadien ka Uttar Pradesh, kaba la ïoh 984 tylli ki mukotduma. Ka Telangana ka wan ha ka kyrdan kaba lai da kaba ïoh 343 ngut.
Ka jingtip jong ka NCRB ka la pynpaw ba bun na kine ki mukotduma la buh jingthoh hapoh ka kyndon 353 jong ka BNS, ki kyndon jong ka aiñ pyntip, bad ka kyndon 505 jong ka IPC kaba ïadei bad ki jingkren kiba wanrah ïa ka jingleh bymman paidbah.
Ki bor pynïaid ki la kdew ba ka jingpynsaphriang ïa ki khubor bakla lyngba ki Social Media, ki aplikeshon phah khubor bad ki Online Account thok ka la kylla long ka jingeh kaba nang jur na ka bynta ki bor jong ka aiñ.
Kane ka jingtip jong ka NCRB ka wan ha ka por ba ka Andhra Pradesh ruh ka dang sakhi ïa ka jingkiew jong ki kam runar kiba ïadei bad ka cyber. Ki jingkheiñ jingdiah jong ki kam runar ba dang shen ki pyni ba ki kam runar ha ka jylla ki la kiew bha, ha kaba ka jingleh thok online ka la mih kum ka jait kam runar kaba kongsan tam.
Ki heh pulit ki la ong ba ka jingpynphriang ïa ki khubor lamler bunsien ka pynmih ïa ka jingïakynad ha ka imlang sahlang, ka jingtieng paidbah bad ka jingpynjot ïa ka nam, kaba pynlong ban buddien kham pyrkhing ïa ki lad pathai khubor Digital.
“Ngi pyntreikam ïa ka polisi ban ym shah ïa ki khubor lamler bad ban ïasam ïa ki khubor bad ki jingtip lamler. La bthah ïa baroh ki ophisar jong ki Distrit unit bad ki Commissionerate ba kin leh mardor ïa ka jingkhynra kaba bniah bad ka jingwad bniah kaba jylliew ban lap ïa uwei pa uwei u briew uba pyntreikam beaiñ hapoh bad ka jingthmu ban thom ïa ka jylla.
La pyntreikam ïa ki kynhun jong ki kam runar ha ka cyber, ki kynhun peitngor ba stad bad ki network wad bniah ha ka kyrdan jong ki ophisar jong ka Station house ha kylleng ka Jylla na ka bynta ban buddien beit, ban wad jingtip bad ban pynmih ïa ki jingtip ba lah ban leh,” ong u DGP u Harish Kumar Gupta.
Ka kaiphod jong ka NCRB ka la pynpaw ïa ka jingsngewkhia halor ki kam runar pyrshah ïa ki kynthei bad ki khynnah ha ki jaka sor.
Napdeng ki 34 tylli ki nongbah bah ha ka ri, ka nongbah Vijayawada ha ka NTR district ka dei kaba ha khliehduh ha ka jingdon jong ki kam runar ba la pynngat hapoh ki kam runar pyrshah ïa ki kynthei bad ki khynnah da kaba don 1,382 tylli ki mukotduma, bud sa ka Vizag kaba don 1,041 tylli ki mukotduma.
Watla ka AP ka la ïohi ïa ka jinghiar ha ki jait kam runar ba la ju leh, ki kam runar kiba ïadei bad ki kynthei, ki khynnah bad ki jaka treikam jong ka cyber ki dang ïai bteng ban long ka jingeh na ka bynta ki pulit.
Ka jingkheiñ jong ka NCRB ka la pyni ba ki kam runar pyrshah ïa ki khynnah ruh ki la ïohi ïa ka jinghiar kaba rit.
