Kolkata, Jymmang:
Ki katto katne spah tylli ki Aadhaar Card, ki kot pynshisha ba don dur jong ki nongthep vote bad ki kot treikam jong ka Mahatma Gandhi Rural Employment Guarantee (MNREG) la ïoh kurup na ki katto katne ki ophis treikam jong ka Trinamool Congress ha West Bengal ha ka sngi U Blei da ki nongshong shnong bad ki nongtrei jong ka seng Bharatiya Janata Party kiba la kynnoh ba kine ki dei kiba la shim na ki nongthep vote hashwa ka elekshon.
Ki nongthep vote ba shisha ki shah pynbor ban sah ha ïing ha ki sngi elekshon, ki la kynnoh.
Ha kawei na ki jingjia, la lap palat 100 tylli ki Aadhaar card na kawei ka ophis jong ka TMC kaba don ha Basanti Debi Colony kaba don ha Bidhan Nagar Assembly konstitwensi.
Ka jingdon jong kine ki card la pynmih ha u snem 2021, ha kaba ka TMC ka la jop 213 tylli na ki 294 tylli ki seat ha Bengal pyrshah ïa 77 tylli jong ka BJP.
“Kiba bun ki card ki dang don ha ki Postal Envelope ba la seal, kaba pyni ba kim shym la pynpoi sha ki nongpdiang. Ki briew na katei ka jaka ki la lap ruh ïa ki katto katne ki kot jaka ba la khang ha ka Briefcase”, la ong uwei u heh pulit ka Bidhan Nagar u bym kwah ban pynpaw kyrteng.
U Dr. Sharadwat Mukherjee, uba dei u Oncologist bad u nongthawaiñ ba la shahjied thymmai jong ka seng BJP na Bidhan Nagar u la ong: “Ki nongthep vote bashisha ki la shah byrngem bad shah khanglad ban pyndonkam ïa ka hok jong ki ban ïoh ïa ka vote. Ngi la ju kren bunsien ïa kane ha ka por ba ngi ïalap elekshon. Ïa ka nongrim jong ngi la pynshisha mynta ka sngi.”
U Myntri barim jong ka tnad pynlip ding, u Sujit Bose, uba la jop ïa ka shuki Bidhan Nagar da saw sien lynter naduh u snem 2009 shwa ban shah rem, u la shah kem ha ka kynhun Enforcement Directorate (ED) ha ka 11 tarik u Jymmang halor ka jingkynnoh ba u la leh ïa ka kam bamsap ha ka jingpynrung kam ha ka Civic Body bad u la dei ban shong patok na ka bynta ka jingshah tohkit ha ka kynhun.
Ka Chameli Naskar, ka Councilor jong ka TMC na ka jaka ba don ka ophis jong ka seng, ka la kam ba kam tip ei ei shaphang ki Aadhaar card. “Ka jingkynnoh, ka dei kaba la shna thok. Ngam tharai ba ka seng jong ngi, ka lah ban dem haduh kum katei ka kyrdan. To ai ba kan don ka jingtohkit”, la ong ka Naskar.
Ha ka jingjia kaba ar, la lap ïa ki katto katne spah tylli ki ID nongthep vote kiba la sahkut ha kawei ka lyngkha ha ka thaiñ Kirnahar jong ka Birbhum distrik, kaba dei ka jaka sah jong ka TMC la 15 snem.
“Ki briew na katei ka jaka ki la pyntip sha ki bor ba dei peit bad la kurup ïa ki kot ki sla,” ong uwei u heh pulit.
U Jagannath Chattopadhyay, uba la jop ïa ka shuki Siuri jong ka BJP, u la ong, “Ki dei ban don da ki hajar tylli kum kine ki card kiba la sahkut ha ki ophis treikam jong ka TMC ha kylleng ka District. Ka TMC ka la seng ïa ka jingsynshar jong ka jingtieng hynrei ki miej ki la kylla mynta. Ka aiñ kan sa shim ïala ka jong ka bynta.”
Ha ka jingjia kaba lai, katto katne spah tylli ki job card jong ka MNREG bad ki ID jong ki nongthep vote la lap da ki nongkyrshan ka BJP na kawei ka ophis jong ka TMC kaba don ha Garbeta ha West Midnapore distrik.
U Palash Das, uba dei u nongbud jong ka BJP na katei ka jaka, u la ong, “Kum kine ki card yn sa lap ha baroh ki ophis jong ka TMC lada don ka jingkhynra.”
Ha ka janmiet jong ka Sngi U Blei, u president ka BJP ka Jylla, u Samik Bhattacharya, u la kren sha ki nongthep vote ha South 24 Parganas distrik ha ka jaka shong dorbar jong ka South 24 Parganas distrik ha kaba yn pynlong biang ïa ka jingthep vote ha ka 21 tarik, Jymmang hadien ka jingkynnoh ba u MLA ka TMC u Jehangir Khan u la byrngem ha ka por ba don ka elekshon ha ka 29 tarik, Ïaïong.
U Saidul Khan, uba dei u kynum jong u MLA, u la shah kem ha ka sngi Thohdieng halor ka jingkynnoh ba u la thombor bad thmu ban pynïap briew.
“Ki briew jong ka Falta kim ju lah ban thep vote laitluid. Shuwa ka elekshon 2021, la pynbna lyngba ki jingpynsawa ha ki mosque, da kaba bthah ïa ki briew ban sah ha ïing. Wat tieng shuh. Ka sorkar BJP ka la don hangne. Ka TMC shen kan sa long kaei kaei jong ki por ba la leit,” la ong u Bhattacharya ha ka jingïalap elekshon.
Ha ka miet jong ka sngi Thohdieng, ki nongshong shnong jong ka Hingalganj ha North 24 Parganas distrik, ki la aiti ïa u Saidul Gazi, uba la shah kynnoh ba wan rung tuh na Satkhira, Bangladesh, ha ki pulit, da kaba pynpaw ba u la thep ïa ka vote jong u ha ka elekshon ba dang shen.
“U Jainal Abedin, uba dei u dkhot jong ka local TMC gram panchayat, u la ai ha nga ïa u Aadhaar bad ki kot ki sla jong ki nongthep vote kiba pynbna ïa ki kmie ki kpa jong u hi kum ki jong nga,” ong u Gazi ha ki lad pathai khubor jong ka thaiñ shwa ba ki pulit kin kem ïa u.
Ki pulit ki la ïathuh ba u Abedin u la phet rieh. Ka lad pathai khubor ka la pyrshang ban ïakynduh ïa u Vice President jong ka TMC ka jylla u Jay Prakash Majumdar bad u General Secretary ka jylla u Kunal Ghosh ban ïoh ïa ka jingkynthoh hynrei ym don uwei ruh na ki uba la jubab halor ka jingshah phone.
