Bhubaneswar, Jymmang:
Ka jingpyntreikam ïa ka Special Intensive Revision (SIR) ïa ka thup nongthep vote da ka tnad elekshon kan sdang ha Odisha naduh ka 30 tarik, Jymmang, la pynbna u Chief Electoral Officer (CEO) u R S Gopalan ha ka taïew ba la lah.
Ïa ka thup kyrteng thep vote ba khatduh yn pynmih ha ka 6 tarik u Nailur, la buh ïa ka 1 tarik u Naitung kum ka tarik kaba biang ban pynkylla ïa ka thup kyrteng bad katkum ka por ba la pynbna da ka EC, ïa ki kam shon kot, pynkhreh bad ai jinghikai yn pynlong naduh ka 20 tarik u Jymmang haduh ka 29 tarik u Jymmang, la ong u CEO.
Ha shwa ka SIR, yn pynbiang ïa ki phorm na ka bynta kane ka jingpyntreikam sha ki nongthep vote la ka long offline bad online. Ki Booth level officer (BLO) kin pynlong ïa ka jingleit jngoh ïa ki ïing sha ki ïing naduh ka 30 tarik, Jymmang haduh ka 28 tarik Jylliew na ka bynta ban sam bad ban lum ïa ki phom.
Ïa ka kam ban pynbeit thymmai ïa ki jaka thep vote ruh yn pyndep ha ka 28 tarik u Jylliew bad ka ïa ka Draft Electoral Roll yn sa pynmih ha ka 5 tarik u Naitung.
Lah ban ujor ïa ki jingdawa bad ki jingpyrshah hapdeng ka 5 tarik u Naitung bad ka 4 tarik u Nailar, katba ka jingpynduh ïa ki kan bteng haduh ka 2 tarik u Nailar. Baroh 45,255 ngut ki BLO kin leit sha ki ïing ki sem jong ki nongthep vote ha ka por ba pynlong ïa ka jingpyntreikam bad uwei pa uwei u nongthep vote un ïoh ar tylli ki kopi ba la shon lypa jong ka phorm jingkheiñ briew. Kawei ka phorm ba la pyndap yn lum da ka BLO, katba ïa ka kopi ba ar ba la soi yn pynphai biang sha u nongthep vote kum ka resit pynskhem.
Ki nongthep vote ki lah ruh ban shim ïa ka phom na ka official portal jong ka Election Commission voters.eci.gov.in bad thep ïa ka phom ba la pyndap online, u la ong.
“Lada don kino kino ki nongthep vote kiba shem jingeh ban pyndap ïa ka phorm, ka BLO kan ai ka jingïarap kaba pura, ïa ki briew kiba dei hok kiba kwah ban pynrung kyrteng ïalade kum ki nongthep vote ba thymmai yn ai ruh ïa ka Form-6 ryngkat bad ka phorm ban ai rai da ka BLO ha kajuh ka por,” u la ong.
Kum shi bynta jong ka jingpynkhreh shwa ka SIR, 94.61 percent na ki nongjied jong ka jylla, kiba don haduh kumba 3.16 klur, la dep ban map da ka thup kyrteng nongthep vote ba la pynmih ha ka por jong ka SIR ba khatduh ha u snem 2002. Palat 9 lak tylli ki jingpyndam la leh halor kane ka jingwad bniah, u la ong.
U CEO u la pynshai ruh ba ki nongthep vote kin ym donkam ban ai kano kano ka kot ba la pyndap ha ka por ba pynlong ïa ka jingkheiñ briew bad ïa ka Draft Electoral Roll yn pynkhreh katkum ki phorm ba la pyndap hok ba la ïoh na ki nongthep vote.
U la kyntu ïa ki sengbhalang ba ki dei ban thung ïa ki booth level agent (BLA) ha man ki jaka thep vote khnang ban pynthikna ïa ka jingkhuid jingsuba ha ka rukom pynkylla ïa ka aiñ. Haduh mynta ki sengbhalang kiba la ithuh ha ka jylla ki la thung 27,723 ngut ki BLA, la ong u Gopalan.
