Mumbai, Jymmang:
Ka sorkar Maharashtra ka la mynjur ïa ki projek pynroi bad pynneh pynsah kiba shongdor T.993.72 klur na ka bynta ki jaka leit jingleit, ki kut bad ki jaka ba pawnam ha kylleng ka jylla.
Ïa kane ka rai la shim da ka kynhun bahakhliehduh ba la pynïaid da u Myntri Rangbah ka Maharashtra u Devendra Fadnavis ha ka lah sngi U Blei. Ki projek ki pynleit jingmut ha kaba pynneh pynsah ïa ki jingtei pateng, ka jingpynroi ïa ki jingtei ha ka kam jngohkai bad ka jingpynbha ïa ki jaka na ka bynta ki nongleit jingleit bad ki nongwan jngohkai. Ki jingmynjur ki wan wat haba ka sorkar jylla ka dang bteng ban pynksan ïa ka jingstad ha ka liang ka pisa tyngka hapdeng ka jingbym thikna ha ka liang ka ïoh ka kot ha ka pyrthei kaba ïadei bad ka jinglong jingman jong ka West Asia.
Katkum ka jingpynbna ba thikna jong ka sorkar, ki projek ba la mynjur ki kynthup ïa ka T.172 klur na ka bynta ka Shri Kshetra Bhimashankar Adarsh Gaon Development project bad T.41 klur na ka bynta ki kam pynneh pynsah ha ka jaka ba la kha ïa u Sant Tukaram Maharaj.
Ka sorkar ka la mynjur ruh T. 134.80 klur na ka bynta ban pynneh pynsah bad pynitynnad ïa ka kut Ajinkyatara bad T. 133 klur na ka bynta ka projek pynsah bad ïada ïa ka Sangam Mahuli Samadhi kaba don ha Satara distrik.
Nalor kane, la mynjur T. 210 klur na ka bynta ban pynroi ïa ka Grishneshwar Jyotirlinga Temple kaba don hajan ka Ellora, katba T. 301.54 klur la mang na ka bynta ki kam pynroi ha ka Parli Vaijnath Jyotirlinga Temple.
Hapoh ka plan pynroi jong ka Bhimashankar, ki bor synshar kin shna ïa ka jaka ïeng bus kaba mynta, ki jaka ïeng kali bad ki jingtei surok kiba la pynbha da kaba thmu ban pynduna ïa ka jingkhapngiah ha ka jaka jong ka temple.
Ki heh sorkar ki la ïathuh ba ïa ki surok kiba rit kiba heh 2.7 meter yn pynheh sha ka hynñiew meter. Ka projek ka kynthup ruh ïa ki lynti ïaid kjat, ki khyrdop ba la tap, ki jingtrei ban shna ïa ka mala jong ka temple bad ka jaka ïalehkai hapoh ka jaka jong ka temple.
Kiwei pat ki jingtei kiba la thmu na ka bynta katei ka jaka ki kynthup ïa ka jaka pynkhuid um jakhlia, ka thanat pulit kaba thymmai, ki jaka shongthait bad ka jingthmu ban tei ïa ka Substation hajan ka thaiñ Dimbhe Dam.
Ka sorkar ka thmu ruh ban wanrah ïa ka jaka ïaid kali Cable bad ban kyntiew ïa ki jingtei ha ka kam jngohkai pyrthei, kynthup ïa ka jingpynroi ïa ka MTDC Bhimashankar Resort bad ki jaka jngohkai pyrthei ha Rajapur. La khmih lynti ba ïa kane ka projek yn pyndep ha u bnai Jymmang, 2027.
Ha Dehu, ka jaka ba la kha ïa u Sant Tukaram Maharaj, ka sorkar jylla kan shimkhia ïa ki kam pynneh pynsah bad pynitynnad ïa ka Bhandara Dongar bad ki jaka leh niam ba marjan.
Ka projek ka kynthup ïa ka jingpynbha ïa ki rukom pynkhuid, ki jaka ai um dih, ki jaka ïeng kali, ki jaka sah na ka bynta ki nongmane bad ka jaka ai jingtip. Ki bor pynïaid ki thung ruh ïa ki jingpynbna ban thung jingthung bad ban pynneh pynsah ïa ki jaka jyrngam ha kylleng ka Bhandara Dongar.
Katba ka plan pynneh pynsah ïa ka Ajinkyatara Fort ka kynthup ïa ka jingpynbha pat ïa ki jingtei ba la rim bad ka jingpynroi ïa ki jaka jngohkai pyrthei kum ki jaka peitkai, ki lynti ïaid ba la pynitynnad, ki jingkieng ba la pyndait, ki jaka pynkhuid bad ki jaka shongthait.
Ka jingpynthymmai ïa ka Raj Sadar, ka jingpynneh pynsah ïa ki kut bad ka jingpynroi ïa ki jaka jngohkai pyrthei ruh ki long shi bynta jong ka jingtyrwa.Ka projek Sangam Mahuli ka kynthup ïa ka jingpynbha pat ïa ki jaka Samadhi jong ka Tarabai, Yesubai bad Shahu I.
Ki heh sorkar ki la ïathuh ba ïa kane ka jaka yn pynroi kum ka jaka jngohkai kaba kongsan lyngba ka jingpynbha ia ka Sangameshwar Temple kaba pawnam, ki Ghat, ki lynti ïaid bad ki jaka peitkai.
Ki jingthmu ki kynthup ruh ïa ka jingkieng thymmai kaba la pyndait bad pynbha ïa ki jingdonkam paidbah.
Na ka bynta ka projek jong ka Grishneshwar Jyotirlinga Temple, ka jylla ka la mynjur ïa ka rukom pynroi ba la pynthymmai ha kaba la mang pisa shuh sa 53.82 klur tyngka.
Ka plan ka kynthup ïa ki jaka sah jong ki nongmane kiba mynta, ki jaka pynïaid laiñ, ki jaka die jingdie, ki Ghat bad ka surok bypass kaba thymmai.
Ïa ka jingmang pisa kaba bun tam la mynjur na ka bynta ka projek pynroi ïa ka Parli Vaijnath Jyotirlinga Temple, ïa kaba yn pyntreikam ha ki lai tylli ki bynta.
Ka bynta kaba nyngkong ka phaikhmat sha ki jingpynbha hapoh ka jaka temple, kynthup ïa ki khyrdop rung kiba heh, ki rukom buh laiñ Digital, ki jaka ap, ka jaka bam jong ka imlang sahlang, ki jaka leh Yoga bad jingpyrkhat bad ki kam pynitynnad.
Ka bynta kaba ar ka kynthup ïa ka jingpynbha pat ïa ki um ba kyntang, ka jingtei ïa ki Ghat, ki jaka ïaid cycle, ki jaka ba lah ban ïoh na ka bynta ki briew kiba don jingduna ha ki dkhot met, ki jaka bam bad ki kor peit bniah CCTV.
Ka bynta kaba lai, ka long halor ka jingpynroi ïa ka Meru Parvat, ha kaba ki bor synshar ki thmu ban buh ïa u mot ba heh jong u Blei Shiva ryngkat bad ka Shiv Purana bad ka Vedic Museum, ka amphitheatre, ki jingpyni da ki Laser light-and-sound bad ki jaka kynjah ki ban lah ban pynleit jingmut. U Myntri Rangbah ka Maharashtra u Devendra Fadnavis u la bthah ïa ki ophisar ban pynthikna ban pyndep ha ka por kaba biang ïa baroh ki projek ba la mynjur bad bthah ruh ïa ki tnad ba kin pynsted ban pyntreikam ïa ki kam pynroi.
