Bhubaneswar, Jymmang:
Ka sorkar jylla ka thmu ban wanrah ïa ka polisi bathymmai jong ka Rehabilitation and Resettlement (R&R) namar ba ka polisi kaba rim kam lah ban weng ïa ki jingeh ba ki briew kiba shah pynkynriah jaka ki ïakynduh, ong u Myntri ka tnad Revenue and Disaster Management u Suresh Pujari ha ka lah sngi U Blei.
Haba kren sha ki lad pathai khubor hadien ka jingïalang ha kaba ïadei bad kane, u Myntri u la ong ba ïa ka R&R policy, 2026 yn wanrah da kaba weng noh ïa ka polisi jong u snem 2006. Ka polisi barim kam shym la pynbeit ïa ki jingeh ha ka kamai kajih, ka ïing ka sem bad ka hok jong ka imlang sahlang kaba ki briew kiba la shah pynkynriah jaka ki ïakynduh kiba mih namar ka jingthmu ban wanrah ïa ki projek ba bun ha ka jingtih marpoh khyndew, ki karkhana bad ki jingtei.
“Ki jingkylla ba kongsan ha ka polisi thymmai kin long ka jingsiew bai lutksan kaba kham heh na ka bynta ka jaka, ka kam kaba la pynthikna na ka bynta uwei u dkhot jong kawei pa kawei ka longïing kaba la shah pynkynriah, ka jinghikai ïa ki sap shwa ban pynkynriah, ka jingpeit bniah ïa ka jingktah ha ka imlang sahlang jong ka shnong bad ka jingthung ïa u R&R Commissioner ban peit bniah ïa ka jingbud ryntih ïa ki kyndon,” bynrap biang u Pujari.
U Myntri u la pynbna shuh shuh ba ka sorkar kan wanrah ïa ka website ba la buh kyrpang ban pynsuk ïa ka rukom pynkylla ïa ka ‘kisam’ jong ki jaka na ka ‘Chasa’ sha ka ‘Gharabari’.
U la ong ba ïa kane ka rai la shim namar ba da ki hajar tylli ki jaka ha Bhubaneswar, Cuttack, Rourkela, Sambalpur bad kiwei kiwei ki Urban Local Bodies (ULB) ki dang sahkut kum ki Chasa kisam watla ym shym la don ka rep ka riang da ki phew snem. Namar kane ka jingeh, ki trai ki ïakynduh ïa ki jingeh bapher bapher ha ka por ba die, ai ram bad mynjur ïa ka jingthmu ban shna ïa ka jingtei.
