Bengaluru, Jymmang:
Ki pulit jong ka Hebbal, ki la pyntroiñ ïa ka rukom treikam jong ka kynhun nongkhaïi drok hapdeng ki jylla, da kaba kem ïa 8 ngut ki briew, kynthup ïa lai ngut ki bar ri, bad kurup 17.5 kg u drok MDMA, uba shongdor T.35 klur na ki. Na kine kiba la shah kynnoh, ki don 6 ngut kiba la shah kem ha Delhi bad ha Haryana.
Na ka liang jong ki pulit ki la ai ïa ka kyrteng jong kine kiba la shah kynnoh kum ka Reena 50 snem ka rta na West Delhi, u Debashish Banerjee 66 snem ka rta na Delhi, u Dheeraj 30 snem ka rta na Delhi, u Mohammed Mansoor P 30 snem ka rta bad u Abdul Sammed 38 snem ka rta kiba shong ba sah ha Bengaluru, u Danfa Gerald uba na Senegal, ka Magreth Liginiko Chale na Tanzania bad ka Obianuu Rita Okeke, 34 snem ka rta.
U Gerald bad u Chale ki wan sha India da ka tourist visa bad ki shong ki sah ha Haryana. U Okeke, u la wan sha India da ka Medical Visa bad u sah ha Delhi, la ïathuh ki pulit.
U Commissioner jong ki pulit jong ka nongbah, u Seemanth Kumar Singh, u ïathuh ha ki lad pathai khubor ha ka sngi Balang, ba ka kynhun pulit jong ka Bengaluru North Division, ka la kem ïa 6 ngut ki nongshah kynnoh, ba kynthup ïa lai ngut ki bar jylla, ha Delhi bad arngut na Bengaluru. Kane ka kynhun ka la ïoh kurup 17.5 kg u drok MDMA na ki jaka bapher bapher.
“Kane ka dei kawei na ki jingkurup kaba heh tam kaba la leh da ka kynhun pulit sor jong ngi. Ka kynhun ka la sdang ïa ka jingkhynra katto katne por mynshwa bad ka la trei shitom bha ban wad ïa ki jingïadei jong kiba shah kynnoh. Bun ki dkhot jong kane ka kynhun runar, ki la phet rieh bad ngi dang pyrshang ban wad ïa ki”, la ong u Singh.
U la ïathuh ba kane ka jingleh thok, ka la paw pyrthei, ha ka jingtohkit jong ki pulit jong ka Yeshwanthpur, halor kawei ka mukotduma, ha kaba la kem ïa khyndai ngut ki briew.
Ki jingtip bad ki sakhi ba la lum ha kata ka jingtohkit ki la ïalam ïa ki pulit sha ka jaka khaïi drok kaba don ha Hebbal.
Kane ka kynhun pulit kaba don 40 ngut ki dkhot ba la treikam ha Bengaluru bad ha Delhi. “Ngin sa bteng ïa ka jingtohkit jong ngi ban lap ïa ki nongsam bad ki nongthied ba kongsan. Ngi la lum katto katne ki sakhi sabut bad ngi dang trei ban wad ïa ki nongsam ba kongsan”, u la ong.
La kynnoh ba utei u nongshah kynnoh u la buhrieh ïa u drok MDMA ha ki sari, ki miej bad ki shuki nar ba lah ban khum, bad phah ïa ki na Delhi sha Bengaluru da ka rel.
Ki pulit ki la ong ba une u drok u lah ban dei uba la shna ha Delhi lane uba la wan tuh na kiwei pat ki ri khamtam na Nigeria. Ha Bengaluru, la kynnoh ba la buh ïa ki mar khaïi ha ki kali kiba pynïeng ha ki jaka ba kyrpang bad la die sha ki nongthied.
Da kaba pynshong nongrim halor ka jingïoh jingtip, ki pulit ha kaba nyngkong ki la kurup ïa kawei ka kali hajan Anand Nagar ha Hebbal bad ki la ïoh kurup 4.3 kg u drok MDMA.
La kem ïa lai ngut ki briew ha kaba ïadei bad kane. Ki pulit ki suba jur ba utei uba shah kynnoh uba la shah kem ha Bengaluru u la thied ïa utei u drok na Delhi bad u la sam sha kylleng ka nongbah.
