Amaravati, Jymmang:
Ki la don palat, 300 ngut ki nongbylla sngi na Nellore distrik kiba la leit phai noh sha la ïing ha ka sngi Balang hadien ba ki la shah pyllait kumba la pynshisha ba ki la shah teh mraw ha kawei na ki jaka shna mawit kaba don ha Nizamabad distrik jong ka jylla, Telangana.
Ïa kane ka jingpyllait im kaba heh bha la pynïasoh lang na ka bynta ka jingpyntreikam da ki bor synshar distrik ha Telangana, ba la ïalam da u Principal District Judge u Bharath Laxmi, hadien ka jingujor sha ka State Legal Services Authority (SLSA) da uwei u nongtrei uba la lait phet na Nellore.
Ki longïing, kiba kynthup ïa ki kynthei, ki khynnah, bad ki tymmen, na ki saw tylli ki jaka shna maw it kaba don ha ka shnong Siddapur, jong ka thaiñ Nandipet. Kiba bun ki la wan buhai shnong na Andhra Pradesh, Telangana, bad Tamil Nadu hadien ba la kular ïa ki ban ïoh ïa ka bainong bad ka boina.
Ki sakhi ba nyngkong ki la pynpaw ba ki nongtrei ki ïakynduh ïa ka jingshah teh ha ka ram, ka jingkhanglad ban ïaid bad shang, ka jingbym ïoh jingsiew, ka jingshah pyntieng, bad ka jingshah lehbeiñ bad shah shoh.
Kiba lait im ki la ïathuh ba ki la shah pynbor ban trei bun kynta man ka sngi bad ki la shah khang ha ka jaka ba don ka karkhana shna mawit da ki bnai ne wat da ki snem ruh. Ki heh sorkar ki la pyntip ba katto katne ngut ki kynthei bad ki khynnah ki la paw ba ki duna bam, ki shong ha ki ïingdara ba la shna da ki plastik hapoh ka jingkhluit kaba jur.
La pynshisha ba ki khynnah ki leh ïa ka kam shna mawit ha ka jaka ban leit skul. Uwei u nongtrei uba la tip kyrteng kum u Thupakula Babu na Nellore u la mudui ïa ka jingujor kaba la pynmih ïa kane ka jingkhynra, da kaba kynnoh ba la set beaiñ bad pyndonkam bakla ïa kiba bun ki longïing.
Kiba lait im ki la ïathuh shuh shuh ba ki nongpynïaid ïa ki jaka shna mawit ki ai ïa ki kot thied marbam kiba shongdor T.200-400 tyngka man ka taïew.
Bun ki la shah pynbor ban soi ïa ki kot ba la ïateh kular kiba thylli bad la byrngem ba kin thombor ïa ki lada ki pyrshang ban ieh ïa ka kam ne ban mih na kine ki jaka.
