New Delhi, Jymmang:
Ki surok jong ka Delhi ki la pynkhreh na ka bynta ka jingpynbha ïa ki jingshai, ha kaba ka sorkar nongbah ka la mynjur ïa ka jingthmu kaba thrang ban bujli ïa jan 96,000 tylli ki jingshai ha surok da ki kor LED ba treikam bha ha kylleng ka nongbah.
Ïa kane ka rai la shim ha ka sngi Balang ha ka jingïalang Hybrid jong ka Expenditure Finance Committee (EFC) kaba la pynïaid da ka Myntri Rangbah ka jylla ka Rekha Gupta. Ïa kane ka projek, kaba la antad ba kan shongdor kumba 473.24 klur tyngka, yn pyntreikam ha ki bynta ha ki surok kiba la maramot da ka tnad pyntreikam paidbah (PWD).
Ka sorkar ka thmu ban pyndep ïa ka jingpynkylla shwa ka Diwali khnang ba ki surok bah jong ka Delhi kin shai pura da ka rukom ai jingshai kaba kham bha.
Kane ka projek ka dei shi bynta jong ka jingpynbna ba la pynbna da ka Myntri Rangbah ka Jylla ha ka mang tyngka jong u snem 2026-27, ha kaba ka la tyrwa ban bujli ïa ki jingshai ba ju pyndonkam ha ki surok da ki kor LED ba khlaiñ kiba pyndonkam ïa ka bor ding.
Kumba ka long mynta, ki surok PWD ki don haduh 45 hajar tylli ki Light kiba la rim kiba la shna da ki High-Pressure Sodium Vapor (HPSV) bad kumba 51 hajar tylli ki Light LED kiba la shna da ki HPSV. Baroh, ka network ka kynthup haduh 96,000 tylli ki jingshai bad 51,160 tylli ki nar pynïeng sainar.
Haba batai ïa ka jingdonkam jong kane ka projek, ka Myntri Rangbah ka la ong ba ka rukom treikam kaba la don mynta ka don katto katne ki jingduna. Namar ba ym shym la don ka rukom peit bniah ha ka por ba shisha, bunsien la ju ithuh ïa ki Light surok kiba bakla tang hadien ba la ïoh ïa ki jingujor.
Ka Myntri Rangbah ka la ong ba kane ka jingthmu kan ïarap ban pynlong ïa ki surok jong ka Delhi kiba lait na ki jaka ba dum.
