New Delhi, Jymmang:
Ka sorkar Delhi ka la weng noh kumba 7.72 lak tylli ki card rashon “bym treikam” hadien ba la leh ïa ka jingpeit bniah ïa ka rukom sam paidbah bad ka dang pynkhreh ban pynkiew ïa ka jingthew jong ka jingïohnong ba man la u snem na ka bynta ki nongïoh myntoi bathymmai sha ka T.2.5 lak tyngka, la ong ka Myntri Rangbah ka Rekha Gupta ha kine ki khyndiat sngi.
Ka Gupta ka la ong ba haba peit ïa ki kam kiba lait, la plie ïa ki aplikeshon ba thymmai online na ka bynta ki card rashon ba thymmai bad ka jingpynrung ïa kiba ha ïing ha sem lyngba ka e-District portal naduh ka 15tarik, Jymmang. “Ha Delhi, ym shym la don rashon card ki ban pynmih ha ki 13 snem ba la leit.
Ka la ong ba la ithuh ïa ki 7,71,384 ngut ki nongïoh myntoi ki bym dei hok bad ki nongïoh jingmyntoi thok ha ka por ba leh ïa ka jingpeit bniah. Na kine, 6,46,123 ngut ki nongïoh jingmyntoi la lap ba ki don palat ïa ka jingïoh kaba la buh bad kumta, kim lah ban ïoh ïa u khaw rashon ba la ai jingïarap. Sa 95,682 ngut ki nongïoh myntoi kim shym la ïoh ïa u khaw rashon haduh shisnem, 6,185 ngut kiba la khlad ki dang bteng ban sah ha ki rekod ïa u khaw rashon, katba 23,394 ngut ki nongïoh jingmyntoi la lap ba ki ïoh jingmyntoi na ki jaka bapher bapher.
Ka Myntri Rangbah ka la ong ba ka sorkar ka la pynkiew ïa ka jingthew jong ka jingïoh jong ka longïing man la u snem na ka bynta ki card rashon na ka T.1 lak sha ka T. 1.20 lak, bad mynta ka dang pyrkhat ban pynkiew biang sha ka T.2.50 lak ban wanrah shuh shuh ïa ki longïing kiba duk hapoh ka lad jingïarap. Ïa kane ka jingtyrwa la khmih lynti ba yn sa pynbeit ha ka jingïalang jong ka kynhun Myntri ban wan, ka la ong.
Ka Gupta ka la ong ba ïa ka rukom sam khaw reshon la pynthymmai. Hapoh kane ka rukom treikam kaba thymmai, ki nongaplai kin hap ban pynpoi ïa ki Aadhaar card, ki jingpynshisha ïa ka jaka sah bad ïa ka sertiphiket bad pynshisha ïa ka jinglah kamai kaba dang shen.
