Kolkata, Jymmang:
U Myntri Rangbah ka West Bengal u Suvendu Adhikari ha kine ki khyndiat sngi ba la lah, u la pynbna ban ai ïa ka jaka kaba jrong 27 kilomitar sha ki bor pahara khappud na ka bynta ki projek ker kynroh kiba la sahteng la slem bha ha shilynter ka khappud India bad Bangladesh bad u la ong ba ïa ki nongwan rung be-aiñ yn kem da ki pulit ka jylla bad yn aiti sha ki shipai khappud.
Ïa kane ka rai ban pynkylla jaka na ka bynta ki kam ïada khappud la shim ha ka 11 tarik, Jymmang ha ka jingïalang ka kynhun Myntri ba nyngkong jong ka sorkar BJP ha kane ka jylla ha ka thaiñNabanna.
Haba kren ha ka jingïalang bad ki heh BSF ha Nabanna ha ka taïew ba la lah, u Suvendu u la ong ba ïa ka jaka kaba kynthup ïa ka bynta ba nyngkong kaba 27 kilomitar ha shilynter u pud yn aiti sha ki BSF hapoh ar taïew, kaba dei ka jingsdang jong ka jingthmu pahara khappud kaba kham jur.
U la pynbna ruh ban pyntreikam ïa ka rukom aiti beit ïa ki “nongwan rung tuh” sha ki shipai BSF da ki pulit ka jylla. U Suvendu u la ong ba ki jaitbynriew ki bym shah ktah ha ka aiñ Citizenship (Amendment) kin shah set bad shah beh noh hapoh kane ka rukom treikam kaba thymmai, kaba treikam mardor.
Katkum ka jingong jong u, ka sorkar pdeng ha u snem ba la lah ka la bthah ïa ka sorkar barim jong ka All India Trinamool Congress ba la ïalam da ka Mamata Banerjee ban aiti beit sha ki shipai BSF ïa ki nong Bangladesh kiba wan buhai shnong beaiñ, hynrei ïa kane ka jingbthah ym shym la pyntreikam satia.
“Ngin ïada ïa ka jylla jong ngi bad kumjuh ïa ka ri lyngba ka jingïatreilang kaba man ka por hapdeng ka sorkar jong ngi bad ki bor BSF. Ka sorkar jylla barim ka la pyrshah ïa ka CAA”, la ong u Suvendu haba kren sha ki nongthoh khubor.
Haba pynshai mano ban mad ïa ka jingshah beh, u la ong ba ki briew kiba rung sha Bengal shwa ka 31 tarik u Nohprah, 2024, bad kiba dei na ki jaitbynriew kiba shah ktah ha ka CAA kin ym shah pyndik ne shah set.
“Ki briew kiba dei na ki hynñiew tylli ki jaitbynriew ki hap hapoh ka CAA. Kito ki bym hap hapoh ka jingpeit jong ka ki dei ki nongwan rung beaiñ, ki pulit kin kem ïa ki bad kin aiti sha ki shipai BSF. Hadien ka jingïakren bad ki BGB, ïa kine ki nongwan rung tuh yn sa beh biang sha Bangladesh. Kane ka mut ban ithuh, ban weng bad ban pynphai biang” u la ong.
U Suvendu u la bynrap shuh shuh da kaba ong ba u State Chief Secretary bad u Home Secretary ki la shah bthah ba ki la dei ban pyntreikam halor ka jingthmu ba la buh.
Ha u snem 2025, ka tnad ki kam pohïing jong ka sorkar pdeng ka la pynpaw ba ki briew shimet kiba dei na ki jaitbynriew rit paid, ki Hindu, ki Sikh, ki Buddhist, ki Jain, ki Parsi bad ki Khristan, na Afghanistan, Bangladesh bad Pakistan kiba wan rung sha India ha ka 31 tarik u Nohprah, 2024, hadien ba ki la mad ïa ka jingshah pynshitom beiñ ha ka niam, kin shah pyllait na ki kot ki sla ba la buh katkum ka passport bad ka jingleit jingwan.
