Bengaluru, Jymmang:
Ka JSW Foundation ka la pynlong ïa ka prokram sam syrnot bad jingtyrwa kam na ka bynta ki samla nongkyndong ha Karnataka kiba la pyndep ïa ka prokram ai jinghikai Electrical Technician kaba la pynlong ha Government ITI College ha Sandur ha kane ka sngi Saitjaiñ.
Ïa kane ka prokram na ka bynta ki samla nongkyndong la sdang ha u bnai Nohprah jong u snem ba la lah da ka JSW Foundation. Ka bynta ba nyngkong jong ka prokram ka la dep bad la sam ïa ki kot ki sla bad ki shithi thungkam sha ki nongthep kam kiba jop ha kane ka jingïalang.
Haba plie ïa kane ka prokram, ka MLA ka Sandur u E. Annapurna Tukaram ka la ai ka jingïaroh ïa ka JSW Foundation kaba la lah ban thaw ïa ka jaka ai jinghikai kaba bha na ka bynta ki samla nongkyndong bad kaba la ailad ïa ki ban ïoh kam ïoh jam hadien ba la dep ban ai jinghikai halor ki sap ki phong.
“Ki samla nongkyndong ki dei ban pyndonkam ïa kum kine ki lad, ban long ki nongtrei kiba tbit bad ban tei ïa ka lawei kaba bha na ka bynta jong ki”, ka la ong.
Shi taïew shwa, kane, u Myntri Rangbah jong ka Karnataka, u Siddaramaiah u la ong ba ka Sorkar Jylla ka thmu ban thaw 20 lak tylli ki kam ha ki bynta bapher bapher, katba ka dang pynkhreh ïa ki samla jong ka jylla sha ki jinghikai kiba kham bha ban ïoh kam ïoh jam.
Haba kren ha ka jingplie ïa ka Campus to Career (C2C) Summit kaba ar sngi ha Bengaluru ha ka sngi Thohdieng, u Myntri Rangbah u la ong, “Ka sorkar jong ngi ka dang ïai bteng bha ban pyndap ïa ka jingïapher hapdeng ka jingnang jingstad bad ka kam ka jam.
U Siddaramaiah u la ïathuh ruh ba ka sorkar Jylla ka ïatreilang bad ki kompeni shimet kum ka Wipro, Azim Premji Foundation bad Infosys ban pynthikna ba ki samla pule kin ïoh ïa ka jingshai ha ka kam lyngba ki internship.
U Myntri ka tnat pule puthi jong ka Karnataka, u MC Sudhakar, u la pynbna ba 4-5 tylli ki skulbah jong ka pyrthei kin plie ïa ki jaka pule jong ki ha kane ka jylla, kaba ailad ïa ki samla pule jong ka jylla ban ïoh ïa ka jingïakynduh ha ka pyrthei. “Ngi la pynleit jingmut bha ban pynlong ïa ki samla pule jong ngi kiba lah ban ïoh kam.Ka jingtbit ha ka ktien phareng ka long kaba kongsan.
Haba ki leit sha ki Interview, ki donkam ban sngewskhem ha kaba ïakren ha ka ktien phareng. Ngi la ïasoi ruh ïa ka soskular bad ka synjuk jong ki Karnataka Chambers of Commerce and Industry (FKCCI) khnang ba ki samla pule kin lah ban ïakynduh bad ka kam bad ban ïoh ïa ka jingmut jingpyrkhat ban sdang ïa ka kam,” u la bynrap.
U Additional Chief Secretary (Medical Education) u Mohammed Mohsin u la pynbna ba yn sa pynmih ïa ki jingbthah hapoh ka tnad pule puthi na ka bynta ban pyndonkam hok ïa ka jingstad thymmai.
U Mohsin u la bynrap ba ïa ka rukom treikam kaba thikna na ka bynta kajuh ruh dang dang pyrkhat mynta ban pyllait. “Ka Innovation Centre ka la thmu ban mih ha Rajiv Gandhi University of Health Sciences ha Bhimanakuppe ha ka surok Mysuru. Ki rai ki dang shim ha kaba ïadei bad ka jingpynïasoh kyrpang ïa ka AI ha baroh ki kolej,” u la ong da kaba bynrap ba ki hospital ba la pynwandur katkum ka NIMHANS ki dang sdang ban seng ha Mysuru bad Kalaburagi.
Ha kane ka jingïalang la ïakylliang ruh haduh hynriew tylli ki MoU, ba kynthup ïa kawei hapdeng ka Karnataka State Higher Education Council (KSHEC), ka British Council bad hynriew tylli ki skulbah paidbah jong ka Karnataka ban plie paidbah ïa ki Scholars na ka bynta ki samla pule kiba tbit bha ha ka kyrdan pule hapoh ka kyrdan pule. Ka prokram shong jaka sah kaba la bei tyngka pura, kaba ar taïew, kaba la pynlong da ka skulbah ba la jied jong ka UK, kan kyrshan ïa ki 30 ngut ki samla pule kiba pawnam ha ka kyrdan pule ba dang hapoh.
Haba kren ha kane kane ka sngi, ka heh nongpynïaid jong ka JSW Foundation South Zone u Peddanna Beedala u la ong ba kane ka prokram kaba lai bnai la lah ban pyndep da kaba jop ha kaba la ïashim bynta da ki 120 ngut ki samla pule.
“Na ki 120 ngut ki samla pule kiba la shah hikai bad ïoh ïa ki syrnot, 66 ngut ki la ïoh kam ha ki kompeni kum ka Schneider Electric, Toyota bad Store Craft ha Bengaluru. Ki la ïoh ban pdiang ïa ka jingsiew kaba T. 18,000 shi bnai. Lyngba kine ki jingtreikam, ka JSW Foundation ka don jingthmu na ka bynta ban kyntiew ïa ki karkhana bad ban nang thaw shuh shuh ïa kiwei pat ki lad aikam aijam sha ki samla,” u la ong.
U heh jong ka tnad treikam jong ka JSW Steel Limited u Mayuresh Bapat u la ong ba ka JSW ka trei ban kyntiew ïa ki samla kiba tbit, kiba sngewskhem bad kiba lah ban shaniah halade kiba lah ban pynbiang ïa ki jingdonkam ha ki karkhana.
“Kine ki prokram ki don ka bynta kaba kongsan ban pynkylla ïa ki samla nongkyndong sha ki nongshong shnong kiba lah ban ïoh bor bad kiba lah ban shaniah halade,” u la ong.
