Srinagar, Jymmang:
Ka kynhun tohkit National Investigation Agency (NIA), ha ka lah sngi U Blei, ka la pynlong ïa ka jingkhynra ha ki jaka kiba bun ha kylleng ki bynta jong ka Kashmir, hapdeng ka jingtohkit kaba dang ïaid shakhmat. La ïathuh ba ïa kine ki jingkhynra, la pynlong lang da ki kynhun jong ka NIA, ki pulit ka Jammu & Kashmir, bad ki pulit jong ka Central Reserve Police Force (CRPF).
Da kaba kdew na ki tyllong khubor, ka lad phah khubor ka la ïathuh ba ka jingtalasi ka dang ïaid ha ki katto katne ki jaka ha kylleng ka Srinagar bad Shopian distrik.
Kane ka long kum shi bynta jong ka jingpynshitom beiñ kaba bteng jong ka tnad kaba ïadei bad ki kam lehnoh ba la kynnoh bad ki kynhun pyrshah ri.
La pynlong ruh ïa ka jingtalasi ha Jamia Siraj Ul Uloom kaba don ha Imamsahib.
Kham hashwa, ka sorkar pdeng ka la khang ïa kane ka jaka halor ka jingkynnoh ba ka don jingïadei bad ki kam lehnoh bad ki kam pyrshah ri, la ïathuh ki tyllong khubor.
Kumba la ïathuh ba kawei pat ka kynhun jong ka NIA, ka la khynra ruh ïa ka ïing sah jong u heh barim ka Jamaat-e-Islami, u Shahzada Aurangzeb, ha ka thaiñ Molu Chitragam ha Shopian distrik.
Ha u bnai Rymphang, 2024, ka sorkar pdeng ka la pynbna ïa ka ‘Jamaat-e-Islami Jammu Kashmir’ kum ka “seng be-aiñ” sa san snem katkum ka kyndon 3(1) jong ka Unlawful Activities (Prevention) Act, 1967.
La seng ïa ka Jamaat-e-Islami ha u snem 1941, la slem bah ki la shah kynnoh ha ki kynhun pahara ba ka donkti ha ki kam kiba ïadei bad ka jingpynshlur ïa ki kam lehnoh, ka jingpynsaphriang ïa ki khubor pyrshah India bad ka jingpynshlur ïa ki jingmut jingpyrkhat ban pynïakhlad ha Jammu & Kashmir.
Hashwa, ka sorkar pdeng ka la pynjari nyngkong ïa ka jingkhang ïa ka ‘Jamaat-e-Islami Jammu Kashmir’ ha u bnai Rymphang, 2019, katto katne bnai shwa ban weng noh ïa ki kyndon jong ka Article 370 na ka jylla barim jong ka Jammu & Kashmir.
Ka lad pathai khubor, ka la pyntip shuh shuh, da kaba kdew na ki tyllong khubor, ba ki jingtalasi ki don jingïadei bad ka jingtohkit kaba dang ïaid shakhmat, watla ki heh sorkar kim pat pynpaw ïa ki jingtip ba bniah ha kaba ïadei bad ka jinglong jong katei ka mukotduma lane la ki don ne em ki jingshah kem ha ka por ba pynlong ïa ka jingtohkit.
