Thiruvananthapuram, Jymmang:
Ka kynhun Enforcement Directorate ha ka sngi Balang ka la pynlong ïa ka jingkhynra ïa ka ïing sah jong u Myntri Rangbah barim ka Kerala u Pinarayi Vijayan, u pyrsa kurim jong u u P A Mohamed Riyas bad katto katne ngut kiwei pat ha kaba ïadei bad ka jingtohkit jong ka halor ka kam thok pisa jong ka CMRL, ong ki heh sorkar.
Ki jingkhynra ki dang ïaid haduh ba la thoh ïa ka khubor ha baroh 10 tylli ki jaka ha kylleng ka Kerala, kynthup ïa ka iing sah ba la ai wai jong u Vijayan ha Thiruvananthapuram bad ka ïing sah jong u Riyas ha Kozhikode.
Ka jingpyntreikam jong ka kynhun ED ka la wan hadien ba ka High Court ka la kyntait ban pyndam noh ïa ka jingbishar jong ka ED bad ban pyndam noh ïa ka jingkhot hajir ba la pynmih da ka tnad pdeng. Ka jingkynnoh jong ka kynhun ED ka long ba ka Exalogic, ka kompeni IT kaba dei trai da ka Veena T, ka khun jong u Myntri Rangbah barim, ka la ïoh pisa T.1.72 klur na ka Cochin Minerals and Rutile Limited (CMRL) da ki snem na ka bynta ki jingshakri IT, ki bym shym la pynpoi satia.
Ka jingkynnoh ka long ba ïa ka jingsiew la pyndonkam ha ka jaka jong kata ban pynbeit ïa ki ram jong ka kompeni jong ka Veena bad kumta la pynphai ïa ka jingkitkhlieh sha ka kompeni ba la pynrung kyrteng paidbah.
Ka ED ka la mudui da ka mukotduma hapoh Prevention of Money Laundering Act (PMLA) ha u snem 2024 ban tohkit ïa ki jingkynnoh.
U General Secretary jong ka CPI(M) u M A Baby u la pynrem jur ïa ki jingkhynra , da kaba ong ba ka dei ka “jingthombor ba la thmu” ïa uwei u nongïalam ba hakhliehduh jong ka Liang Pyrshah da ka sorkar ba la ïalam da ka BJP. U la ong ba kum kine ki jingleh kin ym pyntieng pynsmiej ïa u Pinarayi Vijayan lane ïa ka CPI(M).
“Hato ka sorkar UDF ka donkti lang ha kane ka jingkhynra?” U Baby u la kylli, da kaba bynrap ba ka seng kan dang bteng ban pyrshah ïa kaei kaba ka la batai kum ka jingpynshitom beiñ halor ki kam sain pyrthei.
