Srinagar, Jymmang:
U Lieutenant Lat ka Ladakh, u Vinai Kumar Saxena, ha ka sngi Balang, u la bthah ïa ki pulit ban shim ïa ka rukom treikam kaba khlem shah pyrshah ïa ki nongsam bad ki nongkhaïi drok, da kaba hukum ban pynshitom ïa ki kynhun jong ki nongkhaïi drok, ka jingkyrshan ba ïatylli bad ka jingpynsngewthuh paidbah pyrshah ïa u drok.
U la hukum ban talasi lypa ïa ki kali ha ki jaka rung ba kongsan, kynthup ïa ka Zoji-La bad Sarchu, ban khanglad ïa ka jingwan rung tuh jong ki dawai pynbuaid sha kane ka thaiñ, la ong ki heh sorkar.
U LG u la bthah ruh ïa ki bor ba dei peit ban pynkhlaiñ ïa ka jingpeitngor ha ki jaka ba don jingma bad ban pynjur ïa ki jingpyrshang ban tehlakam ïa ka jingma kaba nang jur jong ka jingdih buaid ha ka Union Territory.
Haba pynïaid ïa ka jingïalang ha Leh bad ki heh ophisar, ki seng bhalang, ki seng niam bad ki seng treimon sngewbha, u Saxena u la pynpaw ïa ka jingsngewkhia halor ka jingkiew kaba shyrkhei jong ki nongdih drok, khamtam eh hapdeng ki samla, ki khynnah rit bad ki khynnah kynthei.
U la hukum shuh shuh ban talasi lypa ïa ki taxi ba kamai ha ka thaiñ, da kaba maham ba yn bat ïa ki kali lada lap ba ki nongñiah kali ki donkti ha ka kam khaïi drok.
Ha ka jingïalang, ki heh sorkar ki la pyntip ba naduh u bnai Ïaïong, 2025, ka Psychiatry OPD ha SNM Hospital, Leh, ka la pynrung kyrteng ïa 101 ngut ki nongpang ba ïadei bad u drok bad 237 ngut kiba la bud dien, 25 ngut kiba ïadei bad u drok bad 39 ngut kiba buddien ïa ka jingdih buaid, bad 15 ngut kiba la buddien ïa ka jingdih buaid.
U LG u la bthah ïa ki bor pynïaid ban pynkhlaiñ ïa ka jingpeitngor ha kylleng ki skul, ki kolej bad ki jaka jngohkai pyrthei. Haduh 64 ngut ki nongpang kiba dih kyiad ruh ki la ïoh ïa ka jingpang Hepatitis C.
Ki nongmihkhmat jong ka Ladakh Buddhist Association (LBA) ki la pynpaw ïa ka jingsngewkhia halor ka jingbym don ki kyiad kiba eh ha ki dukan die waiñ, da kaba kynnoh ba ka pynkhih ïa kiba bun ki briew shimet sha ki jingdih buaid.Ki doktor pyrkhat ki la pynpaw ruh ïa ki jingjia jong ki briew kiba shaniah ha ka kyiad kiba pyni ïa ka jinglong kaba shyrkhei bad kaba long kum ka jingsngew lyngngoh ha ka jingbym don kyiad.U Saxena u la pynthikna ba yn sa bishar bniah biang ïa ka polisi khaïi marbam jong ka Ladakh kaba la don lypa.
U LG u la bthah shuh shuh ïa ki bor pynïaid ban pynkhlaiñ ïa ka jingpeitngor ha kylleng ki skul, ki kolej bad ki jaka jngohkai pyrthei. U la pynbna ruh ba u Helpline Number 112 un treikam kum u nombar jingïarap ba la pynïasoh lang na ka bynta ka jingai jingmut, jingsumar bad jingkyrshan ban pynbha pat.
Yn thaw ïa ki kynhun ai jingïarap ba kyrpang kiba kynthup ïa ki nongtrei imlang sahlang, ki Nurse bad ki nongap ban ïarap ïa ki longïing kiba shah ktah, katba ki DDAC kin pynbiang ïa ki lad leit jingleit na ka bynta ki nongpang kiba dang shah sumar bad shah pynbha, la ong ki heh sorkar.
Yn thaw ruh ïa ki jaka ba kyrpang na ka bynta ki kynthei bad ki khynnah ha ki jaka pynbha katba yn pynrung ïa ki prokram ai jinghikai kam bad pynroi ïa ki sap na ka bynta ki nongpang kiba dang koit ban ïarap ïa ki ban pynïasoh biang bad ka imlang sahlang, ki la bynrap. U Saxena u la bthah ruh ban sdang ïa ka jingïalap paidbah pyrshah ïa u drok ha kylleng ka Ladakh naduh ka 1 tarik u Jylliew.
Ki heh sorkar ki la ïathuh ba ki DDAC ha Ladakh ki la dep ban pynlong ïa ki jingpynshai, ki jingïalang bad ki prokram shabar kiba la poi sha palat 16,000 ngut ki briew.
Haduh mynta, ki don 337 ngut ki nongpang ha OPD kiba la ïoh jingsumar bad 53 ngut ki nongpang kiba la koit bha, ki la ïathuh.
La rai ruh ban ïasoi ïa ka MoU bad ka Mahabodhi Karuna Charitable Hospital na ka bynta ka jingkyrshan ban pynbha pat ïa ki nongpang ba pyndonkam ïa ki jingdih buaid, kynthup ïa ki jingdih dawai bad ki jingshah ai jinghikai na ka bynta ban im bha bad ïoh jingkoit.
