Lada uno uno ruh un sumar ïa ka ktien jong nga un ym mad ïa ka jingïap lano lano ruh. Haba phai sha kitei ki kyntien ba ka Baibl ka hikai ka paw ba ym don uwei ruh u briew ba sumar ïa ka ktien U Blei. Namar baroh u briew ym don uba lah ban lait na ka jingïap. Kane ka mut ym don ba patiaw bad ba sumar ïa ka ktien u Blei. Ka lah ruh ban dei ba kane ka jingong ka long tang ka jinghikai kaba bakla ïa ngi ki briew lyngba ka niam. Namar ym don uba lah ban lait na ka jingïap katba dang dei hi u briew. Hangne ka paw shai ba wat ki riewngeit Khristan ruh kim patiaw ïa ka ktien u Blei. Namar ba ym don na ki wat uwei ruh u ba lah ban lait na ka jing-ïap. Ki la ïap kumjuh kum ki bym long Khristan.Te kumta ym shisha kiba shah shkor ïa ka ktien u Blei. Ka mut ym don uba hok bad uba shisha. Uei uei baroh uba da long na ka jong ka jingshisha u shahshkor ïa ka ktien jong nga (Ioannis 18 : 37). Kane ka pyni ba u Blei u long u Blei jong baroh ki briew ym dei u Blei tang jong ki kynhun niam kane ka pyrthei. Ki niam ki shim kabu ba u Blei jong ki u long u Blei uba shisha katba u Blei kiwe u long u Blei ba thala. Kynmaw ko paralok to phin shañiah beit tang na u Blei phin ïoh ka jingsuk ha kane ka pyrthei.
C. B. Iawphniaw
