Bengaluru, Jymmang:
U Lat jong ka jylla Karnataka u Thaawarchand Gehlot, ha ka sngi Thohdieng, u la pdiang ïa ka jingiehnoh kam jong u Siddaramaiah, u ba kham hashwa, u la hiar shuki kum u Myntri Rangbah ka Jylla. Ha kajuh ka por, la ïathuh ba u Symbud Myntri Rangbah jong ka jylla u D.K.Shivakumar, un leit ban ïa kynduh ïa u Rahul Gandhi, nongïalam jong ka seng Congress bad u President ka seng u Mallikarjun Kharge, ha kane ka sngi ha Delhi, na ka bynta ban ïakren halor ka jingpynkylla ïa ka kynhun Myntri jong ka Jylla.
Katkum ka jingpynthikna kaba la pynmih na Lok Bhavan ha Bengaluru, u Lat u la pynkhyllem ruh ïa ka dorbar Myntri ba la khlieh da u Siddaramaiah da kaba treikam mardor. Hynrei u Siddaramaiah un dang bteng kum u Myntri Rangbah ka Jylla tad haduh ban da pynbeit da kumwei pat.
Katkum ki tyllong khubor jong ka seng ba la kdew da ka lad pathai khubor, la ong ba u Myntri Rangbah ka Jylla ban mih noh na ka kam u Siddaramaiah, u DK Shivakumar, bad u nongpynïaid jong ka AICC ha ka jylla u Randeep Surjewala kin pynlong ïa ka jingïakren bad ki nongïalam ba hakhliehduh jong ka seng.
U Siddaramaiah, u la aiti ïa ka jingiehnoh kam jong u, ha ka sngi Palei, hadien ba la don bun bnai, ïa ka jingkynnoh, halor ka jingkylla nongïalam ha ka saiñ pyrthei jong ka Karnataka.
U Siddaramaiah, ha ka sngi Palei, u la aiti ïa ka jingiehnoh kam jong u, sha u Special Secretary jong u Lat ka Jylla, ha Lok Bhavan, da kaba ong ba ïa kane ka rai, la shim “da ka mon sngewbha” halor ka jingai jingmut jong ki bor ba halor jong ka seng Congress, hapdeng ki dak jong ka jingkylla nongïalam ha ka Jylla.
Ka jingaiti ïa ka jingiehnoh kam jong u kum u Myntri Rangbah ka Karnataka, ha u Lat, kaba la pynhap pyrda ïa ka jingïaknieh nongïalam kaba la neh lai snem bad u DK Shivakumar, kaba la don ha kata ka por, kaba la buh sharud bad buh jingeh ïa ka seng kaba synshar.
U la pynthikna ruh ba u Shivakumar un shimti bad mih bujli ha ka jaka jong u.
La sakhi ïa ki jingjia kiba pynsngewsih, ha kaba ki nongkyrshan jong u ki ïam, ki ktah ïa ki kjat jong u katba ki dang ïakynduh ïa u.
“Ka bor synshar jong ka Congress ka la tyrwa ïa u DKS kum u Myntri Rangbah ban sa wan… Nga la mynjur ïa kane,” u la ong ha ka step jong kane ka sngi ha ka jingïa-kynduh bam jingbam step bad ki dkhot ba rangbah jong ka sorkar jong u, kynthup ïa u Myntri Rangbah ba la shahjied, ha ka ïing sah jong u kaba don ha Bengaluru.
Haba kren ha ka jingïalang bad ki nongthoh khubor, u Siddaramaiah u la ong ba u la iehnoh ïa ka kam hadien ka jingbthah na ki nongïalam ka seng bad u la ban jur ba kam don kano kano ka jingpynbor ha lyndet jong katei ka kam.
“Nga la iehnoh ïa ka kam da ka mon sngewbha. Kam don kano kano ka jingpynbor ïa nga,” u la ong bad bynrap ba ka Congress Legislature Party (CLP) bad ka All India Congress Committee (AICC) kin ai ïa ka rai na ka bynta u Myntri Rangbah ka Jylla uban wan.
Ki kyrtong jong ka Rajya Sabha, ki kyrtong jong ka MLC bad ka jingpynkylla ïa ka kynhun Myntri kin long kiba hakhmat eh ha kane ka jingïalang ba hakhliehduh jong ki nongïalam ka Congress, la ïathuh ki tyllong khubor.
Ki la bynrap shuh shuh ba katto katne ngut ki Myntri na ka kynhun Myntri jong u Siddaramaiah kim lah ban ïoh jaka shong ha ka kynhun Myntri jong ka jylla ba la ïalam da u DK Shivakumar. Hynrei ban pynneh ïa ka jinglong ryntih ha ka imlang sahlang bad ka thaiñ ha ka sorkar, la ïathuh ba lah ban thung saw ngut ki Symbud Myntri Rangbah.
Kaba kham paw pyrthei ka long ba u khun jong u Siddaramaiah, u Yathindra, u Dkhot jong ka ïingdorbar thaw aiñ, la khmih lynti ba un shah pynrung ha ka kynhun Myntri jong u Shivakumar bad u lah ban ïoh ïa ka kam Myntri kaba kham halor.
Na ki saw tylli ki shuki jong ka Rajya Sabbha kiba la thmu ban thep vote ha Karnataka, ka Congress ka la thmu ban jop ar tylli da kaba suk bad ka don ka jingjop ha ka shuki kaba lai ha kaba ka donkam tang katto katne ki vote, ong ki tyllong khubor.
U Surjewala, un aiti ïa ka kynhun ba dei khmih na ka bynta ar tylli ki seat Rajya Sabbha na ki lai tylli, bad u Kharge, un sa shah pynrung biang ha ka RS, ong ki tyllong khubor.Yn sa aiti ruh ïa ka kynhun jong ki kyrteng kiba lah ban long sha ki nongïalam ba hakhliehduh, na ka bynta ka jingthep vote MLC ha ka jylla, ha ki hynñiew tylli ki seat.
