New Delhi, Jymmang:
Kumba la pynbna, la ong ba ka Delhi kan sdang ïa ka Special Intensive Revision (SIR) jong ka thup kyrteng jong ki nongthep vote jong ka naduh ka 30 tarik u Jylliew, ha kaba ki ophisar kiba don ha ka Booth-Level Officers (BLOs) kin leh ïa ka jingpynshisha sha man ki thliew ïing, ong u Chief Electoral u Ashok Kumar ha ka sngi Balang.
Haba kren ha ka jingïalang bad ki nongthoh khubor , u CEO jong ka Delhi u Ashok Kumar u la ong ba ïa ki jingpynkhreh na ka bynta kane ka jingpyntreikam, kynthup ïa ka jinghikai ïa ki BLO bad ka jingpynmih ïa ki phorm jingkheiñ briew, yn pynlong hapdeng ka 20 tarik u Jylliew bad ka 29 tarik u Jylliew.
“Ki don ki jingpeit bniah ha man la ka sienjam jong ka jingpynshisha, bad ki seng saiñpyrthei kin ïadon bynta lyngba ki agent kiba don ha ka kyrdan jong ki Booth-Level-Agents (BLAs),” ong u Kumar.
U la bynrap ba baroh ki jingtip kiba ïadei bad kane ka jingpyntreikam yn sa pynbna ha ka website jong ka ophis CEO.
Ban pynsuk ïa ka jingïashim bynta jong ki nongthep vote, yn pynlong ïa ki jingpynsngewthuh paidbah bad ki kynhun ba kyrpang ban ïarap ïa ki nongjied ban aiti ïa ki phorm jingkheiñ jong ki.
Ki nongthep vote kin ïoh ar tylli ki kopi jong ka Enumeration Form, kawei na kine ki dei ban pyndap bad pynphai biang sha ki BLO. Kan don ruh ka lad ban aiti da ka Digital na ka bynta ki phorm ba la pyndap.
Ka jingpynkylla kan ktah ïa baroh ki nongthep vote kiba la dap 18 snem shaneng naduh ka tarik ba la buh ha ka 1 tarik u Risaw.
Katkum ka jingong jong ka ophis treikam jong u CEO, palat 13,000 ngut ki BLO kin pynlong ïa ka jingkheiñ briew na ki ïing sha ki ïing ha kylleng ka nongbah jong ka ri. Man la u nongjied uba la don lypa uba ka kyrteng jong u ka paw ha ka thup nongjied yn ai ïa ki phorm jingkheiñ ha ki ar tylli ki dur ha ka por ba pynlong ïa ka jingpynkhreh.
Ka jingleit jngoh sha man ki thliew ïing da ki BLO kan sdang naduh ka 30 tarik u Jylliew bad kan kut ha ka 29 tarik u Naitung, ïa ka Draft Electoral Roll yn sa pynmih ha ka 5 tarik u Nailar, katba ïa ka thup nongthep vote ba khatduh hadien ka SIR yn sa pynmih ha ka 7 tarik u Risaw.
“Kumba 13,000 ngut ki BLO kin pynlong ïa ka jingkheiñ briew sha man ki thliew ïing,” ong ka ophis treikam jong u CEO.
