Patna, Jymmang:
Ka Rohini Acharya, ka khun jong u Lalu Prasad Yadav, ha ka sngi Thohdieng, ka la kyntait ïa ki jingkynnoh ba kan ïakhun ïa ka elekshon ban wan ha ka Bihar Legislature Council bad ka la kynnoh khlem da thew ïa ki nongïarap jong u hynmen bad nongïalam jong ka seng, u Tejashwi Yadav, ba ki la thmu pyrshah ïa ka bad ki la pynsaphriang ïa ki khubor hamsaïa.
Watla ka Rohini ka la kren shai ba kam pan shuki MLC, hynrei ka jingkynnoh ka dang ïai bteng ba u Lalu Prasad u lah ban pynkohnguh ïa ka ban pdiang ïa kawei.
Haba thmu ïa ki nongïarap jong ka Tejashwi bad pynkynmaw biang ba kan ym ïakhun ïa ka elekshon MLC, ka Rohini ka la thoh ha ka rynsan X: “Ki durkhmat jong kito kiba don jingthmu sniew kin sa thang ïong biang. Ki runar ki ju rungtuh, kito kiba don jingthmu ban ïatreilang ha ka ban pyrshah, ki pynsaphriang ïa ka khubor hamsaïa, lyngba ka jingïarap jong ki katto katne tylli ki Media ha kaba la ong ba ngan sa ïakhun ïa ka election ban wan. Kine ki briew kiba don ki jingthmu kiba jakhlia ki la pyrshang mynshuwa ïa kaei kaei kaba kum kata da ka jingthmu ban pynsniew dur bad pynthoh bria bad ha kata ka por ruh la pynpaw pyrthei ïa ki jinglamler jong ki, bad ha kane ka kynti, kan sa jia biang. Kine ki dei kijuh ki briew kiba, tang katto katne bnai mynshuwa, ki la pynphriang jur ïa ki khubor shaphang ka jingjied ïa u khun jong nga uba dang rit bad ka kiaw kurim jong nga ka ïakhun ïa ka elekshon Assembly.”
Ka la ong shuh shuh: “Nga kwah ban ong ïa kito kiba pynphriang bad thaw thok shaphang jong nga ba ym don kawei ruh na ki jingthmu ne jingthok jong kine ki briew kan ym ktah ei ei ïa nga ne ïa ka dur jong nga, namar ka pyrthei ka tip ba nga dei u briew uba kren beit beit, palat ïa kano kano ka jingkwah ne jingpynshoi.
Ha ka 15 tarik u Naiwieng, jong u snem ba la lah, ka Rohini ka la kynnoh ïa u Tejashwi bad ïa u nongïarap ba jan jong u, u MP ka RJD u Sanjay Yadav, ba ki la “beh noh” ïa ka na ka longïing, katto katne kynta hadien ba ka la pynbna ïa ka rai jongka ban “ieh noh ïa ka kam saiñpyrthei” bad ban “kyntait” ïa ka longïing jongka.
Ka la kynnoh ba ka la shah pynjah burom, shah lehbeiñ bad wat shah shoh ruh” haba ka la kylli jingkylli ïa u Sanjay Yadav halor ka jingshah rem jong ka seng ha ka elekshon dorbar thawaiñ ba la dep.
“Ngam don ïing. Phi lah ban leit kylli ïa u Sanjay Yadav, u Rameez bad u Tejashwi Yadav. Ki dei kitei kiba la beh ïa nga na ka ïing”, la kynthoh ka Rohini Acharya.
Katkum ka jingong jong ka Election Commission, ki jingthep kyrteng na ka bynta ki khyndai tylli ki seat kin thep hapdeng ka 1 tarik u Jylliew bad ka 8 tarik Jylliew.
Ka jingkhmih bniah kan long ha ka 9 tarik, Jylliew bad ka tarik ba khatduh ban weng kyrteng kan long ha ka 11 tarik, Jylliew bad ka jingthep vote, lada donkam kan long ha ka 18 tarik jylliew, bad ka jingpynkhreh ïa ka elekshon kan kut ha ka 20 tarik, Jylliew.
Baroh 242 ngut ki MLA jong ka Bihar Assembly ki don hok ban thep vote ha ka elekshon MLC.
Kiba shongthait ki kynthup ïa u Kumud Verma jong ka JD(U) bad u Prof Ghulam Ghaus, u Mohammad Farooq bad u Sunil Kumar Singh jong ka RJD, u Bhishma Sahni bad u Sanjay Prakash uba ju tip ruh da ka kyrteng kum u Sanjay Mayukh jong ka BJP, bad u Sameer Kumar Singh jong ka Congress.
Lait na kitei, ka elekshon ka dang ïaid ruh na ka bynta ki shuki ba lait hadien ka jingiehnohkam jong u Bhagwan Singh Kushwaha jong ka JD(U) bad u Myntri Rangbah ka JD(U) u Samrat Choudhary ha ka 16tarik Naiwieng, 2025.
Ka samoi treikam jong baroh khyndai ngut ki dkhot ba mynta kan kut ha ka 28 tarik u Jylliew bad la buh ban pynlong ïa ka elekshon sha ki khyndai tylli ki seat jong ka ïing dorbar thawaiñ jong ka Bihar ha ka 18 tarik u Jylliew.
