Ahmedabad, Jymmang:
Uwei u briew uba la shah suba ba u don ïa ka jingpang Ebola na Congo u la phah ïa ki mashin ka koit ka khiah jong ka Gujarat sha ka rukom ai jingïarap kyrkieh hadien ba uwei u rangbah ba 37 snem ka rta uba la poi ha Vadodara lyngba ka Mumbai u la don ïa ki dak jingpang kum ka suhkhriat bad jyrhoh, kaba la pynmih ïa ka jingtieng ïa une u khñiang jingpang ba pynïap briew uba dang saphriang mynta ha ki katto katne ki ri jong ka Africa.
Utei u briew, ha kaba nyngkong, u la shah sumar ha kawei ka Hospital ha Vadodara, na ka bynta ar sngi, hadien ba u la pyni ba u don ïa ki dak ki shin kiba rit.
Hynrei namar ba ki doktor ki la ïohi ïa ki dak kiba suba kiba ïadei bad u khñiang jong ka jingpang kaba lah ban don, mar mar la pynkynriah noh ïa u sha Ahmedabad Civil Hospital na ka bynta ban buddien bad test kham bniah.
La lum ïa ki nongmuna jong u bad la pynkit noh mardor ban leit eksamin ha Laboratory namar ba ki heh ka tnad ka koit ka khiah ki la sdang ban wad ïa baroh kiba la ïakynduh ïa u.
Kane ka jingsuba, ka la pynmih mardor ïa ki jingsawa namar ba ka jingpang Ebola, ka dang ïai bteng ban pynjulor ïa ki ri jong ka Africa, kynthup ïa ka Uganda, Congo, bad South Sudan, ha kaba ki tnat ka koit ka khiah, ki dang ïakhun ban teh lakam ïa kane ka jingsaphriang jong ka jingpang.
Katba ka jingsyier ka la sdang ban saphriang ha ki Social Media, u Myntri ka koit ka khiah ka Gujarat, u Praful Panseria, u la shim khia ban pynjem ïa ka jingsyier jong ki paidbah.
Ha ka sngi Palei, ka Panseria ka la pynbna ba ka report jong utei u nongpang ba la suba ba u don ïa ka jingpang Ebola ka la wanphai biang bad kaba pynshai ba ka Gujarat bad ka India mynta kim pat don satia kiba ïoh ïa ka jingpang Ebola.
“Ki nongshong shnong kim dei ban sheptieng ne ngeit ïa ki khubor hamsaïa. Ka kaiphod jong u nongpang ba la suba ka la wan biang Negative. Ym pat don wat tang uwei ruh uba la ïoh ïa ka jingpang Ebola ha Gujarat ne ha India mynta,” ong u Panseria da kaba kyntu ïa ki briew ban shaniah tang ha ki jingpynbna jong ka tnad ka koit ka khiah.
Wat shwa ba ka kaiphod kaba sniew kan poi, ki bor synshar ki la dep ban pynlong bad pyntreikam da ki kyndon kiba pyrkhing.
Ki la don lai ngut ki briew kiba ïakynduh markhmat ïa une u nongpang ba kynthup ïa uwei u doktor bad arngut ki paralok jong u, la pynkynriah bad pynïakhlad noh mardor ïa ki kum ka lad jingïada ïa kiba bun.
Ban pynkhlaiñ shuh shuh ïa ka jingpynkhreh, la buh kyrpang ïa ka Isolation Ward kaba don 30 jingthiah ha SVP Hospital ha Ahmedabad kyrpang na ka bynta ban sumar ïa ki nongpang kiba suba ba ki don ïa ka jingpang Ebola lada jia ba ka jinglong jingman ka nang jur.
Ka rukom pyntip jong ka jylla mynta ka la pynïar beit sha ki kad liengsuiñ ruh kumjuh.
Ha Ahmedabad International Airport, ka jingpeit bniah kaba jur ïa ki nongleit nongwan kiba wan na ki ri Africa kiba la shah ktah ha ka jingpang Ebola la leh man ka sngi hapdeng ka por 6 baje janmiet haduh ka por 10 baje mynstep.
Ki heh sorkar ki la ong ba kane ka jingpeit bniah ka long tang ïa ki nongleit jingleit kiba wan na ki ri kiba don jingma bad ki nongleit nongwan kiba rit paid kim donkam ban khuslai.
Ha kajuh ka por, ki bor pynïaid liengsuiñ bad ka koit ka khiah jong ka India ki la pynkhlaiñ ïa ki kyndon ha ka kyrdan jong ka ri hapdeng ka jingsngewkhia kaba nang kiew ha ka pyrthei halor ka jingpang Ebola.
Ka Directorate General of Civil Aviation (DGCA) bad ka Ministry of Civil Aviation (MOCA) ki la pynjari da ki kyndon kiba pyrkhing bha ïa ki nongleit nongwan kiba wan nabar ri.
Hapoh kane ka protocol kaba thymmai, baroh ki nongleit nongwan kiba rung sha ki kad liengsuiñ jong ka ri India kin hap ban pyndap ïa ki Self-Declaration Forms (SDF), kaba ailad ïa ki bor synshar ban ithuh kloi bad pynkyrpang ïa ki nongleit jingleit kiba lah ban don ha ka jingma kaba khraw.
La bthah ruh ïa ki kompeni liengsuiñ ban pynbna ïa ka rukom pyndap phorm hapoh liengsuiñ shwa ban hiar khnang ban lait na ka jingkhapngiah bad ban pynduna ïa ka jingma na ka jingpang hapoh ki Terminal.
Ha ka jingpyrshang ban pyntreikam kaba heh, 24 7 ngut ki nongtrei ka koit ka khiah kiba hakhmat eh la buh ha ki jaka poi ha kad liengsuiñ ban buddien ïa ki nongleit nongwan kiba wan bad ban ithuh kloi ïa kiba suba ba ki don ïa ka jingpang.
Ki heh sorkar ki la pynpaw ruh ba ka sorkar ka lah ban sdang biang shen ïa ka Air Suvidha portal ban pynsuk ïa ka jingpeit bniah bad jingbuddien ïa ka koit ka khiah jong ki nongleit nongwan.
