Kolkata, Jylliew:
Shi sngi hadien ba u General Secretary jong ka seng Trinamool Congress u Abhishek Banerjee u la shah thombor, ka jingïalang jong ki nongthaw aiñ ba dang shu jied thymmai jong ka seng kam shym la lah satia ban ïaid shakhmat namar tang 20 ngut na ki 80 ngut ki MLA ki la poi sha ka ïingsah jong ka Mamata Banerjee ha Kalighat. Ka jingbym don haduh lai bynta na ka saw bynta jong ki nongthaw aiñ ka la pynkiew ïa ki khmat. Hynrei ka TMC ka la kloi ban weng noh ïa ki jingsngewkhia, da kaba ong ba katto katne ngut ki MLA ki dang bunkam ban pynlong ïa ki jingïakhih pyrshah ïa ki bor synshar halor ka jingkynnoh ba don ka jingshah thombor ha ka saiñ pyrthei bad kumta kim shym la lah ban leit sha katei ka jingïalang.
U nongaiktien jong ka seng TMC, u Kunal Ghosh, u la ong ba bun ki nongthaw aiñ kim shym la lah ban leit sha katei ka jingïalang namar ki jingjia kiba la jia ha madan hadien ka jingshah thombor jong u Abhishek Banerjee ha ka sngi Saitjaiñ bad ka jingkynnoh thombor ïa u MP ka seng u Kalyan Banerjee hadien shisngi.
Haba ïakren bad ki nongthoh khubor shabar jong ka ïing sah jong ka Myntri Rangbah barim ka Mamata Banerjee ha Kalighat, ha kaba la thmu ban pynlong ïa ka jingïalang, u Ghosh u la ong ba ka seng ha ka jaka kata ka la rai ban pynjur ïa ka prokram ïakhih jong ka ha kine ki 48 kynta ban wan pyrshah ïa ka sorkar BJP ba la ïalam da u Suvendu Adhikari. U la pynbna ruh ïa ki jingïalang ha ki block-level bad ki ward-level ha ka lah sngi U Blei, bud sa ka jingïashong kyllaiñ mungor kaba shisngi ha pdeng Kolkata ha ka sngi Ba-ar ban ïalam da ka Mamata Banerjee.
