Ha ka por ba long MLA u Bah George u la rah ïa ka nam ka burom jong ka Umroi Constituency ha kaba ki paidbah ka ri khasi, Jaiñtia bad ka Jylla ki ïaroh ïa ka jingtbit jong u Bah George ban ïasaid dorbar, u dei u wei na ki rangbah nongmih khmat bad nongïalam ba stad ba shemphang uba shlur uba nud bad uba ju shim bynta ban kren ïatai ïathir halor kiba bun ki mat ki jura (issues) bapher bapher kiba ai jingmyntoi bad kiba ktah lang ïa baroh kum ka imlang ka sahlang, ym tang na ka bynta ka Umroi Constituency hynrei ïa ka Jylla hi baroh ka wei, ha kaba wat ki para nongmih khmat ruh ki ieid bad burom ïa u, namar ka jingstad, ka jingtbit bad ka jingshemphang jong u. Ki paidbah ka Ri Khasi, Jaiñtia bad ka Jylla hi baroh ka wei ki sngew bynnud ba u Bah George B Lyngdoh u rem election na Umroi Constituency, ka jingkyntait jong ki paidbah ka Umroi ïa u Bah George ha ka election ba la dep ka la long kumba ki la bret ïa u Mawlynnai ha khmat jong ki sniang ki bymtip ïa ka jingkordor jong u Mawlynnai. Ha ka kam jied nongmih khmat ngim lah ban ïapein lyngba ka Pisa, lyngba ki jingdih pynbuaid, bad kiwei kiwei ki rukom pynthame, ngi dei ban jied da ka jingkitkhlieh, da ki briew kiba lah ban ai ka jingshakri ïa ki paidbah, kiba don ka jingkitkhlieh, kiba kynsai, kiba stad kiba shemphang ha baroh ki liang ban long ka sur Jong ki paidbah ha ka Dorbar thaw aiñ.
Bah Abert Maring, Nongpoh
