Kolkata, Jylliew:
Kum ka jingkynnoh ba ka sorkar barim jong ka seng Trinamool Congress kam shym la pynlong ïa ka jingkheiñ briew ha West Bengal, u Myntri Rangbah ka jylla u Suvendu Adhikari u la ong ba ka jingkheiñ briew kan sdang naduh ka 1 tarik u Nailar bad kan bteng haduh u bnai Rymphang jong u snem ban wan.
U Myntri Rangbah ka jylla u la ong ruh ba ka jingkheiñ briew ha West Bengal kam don jingïadei eiei bad ka saiñ pyrthei.
U la ïathuh ha ki nongthoh khubor ha State Secretariat Nabanna ha ka taïew ba la lah ba ka sorkar pdeng ka la phah shithi sha ka sorkar barim ha u bnai Rymphang, 2025, ha kaba la kyntu ïa ka ban pynlong ïa ka jingkheiñ jingdiah ha kane ka jylla, hynrei ka Myntri Rangbah barim ka jylla ka Mamata Banerjee ka dang sahkut halor kane ka kam.
Haba kyntu ïa ki briew ban ïashim bynta ha kane ka kam, u Suvendu u la ong ba ka jinglum Census 2027 kan long ha ka jylla hapdeng ka 1 tarik u Nailar bad kaba kut jong u bnai Rymphang jong u snem ban wan, bad pynskhem ba ka rukom kheiñ khlieh kam don jingïadei bad ka saiñ pyrthei.
U Myntri Rangbah ka jylla u la ong ba ka India ka la kiew bha ha ka jingkheiñ briew bad ba ka Bengal ka donkam ban ïaid ryngkat bad kiwei pat ki jylla.
“Ka sorkar barim kam shym la lah ban pynlong ïa ka jingkheiñ briew namar ki katto katne ki daw ha ka kam saiñ pyrthei, u Symbud Myntri Rangbah ha kata ka por ruh u la ap ïa ka jingïamynjur lang ha ka saiñ pyrthei shwa ban pynlong ïa ka jingpyntreikam ha kane ka jylla bad kum ka jingmih ngi la sahdien na kiwei pat ki jylla”, u la ong.
“Mynta, ka sorkar jong ngi ka la shim ïa ki sienjam kiba kloi. Ka jingpynlong ïa ka jingkheiñ briew ka dei kawei na ki mat ba kongsan ha ka jingïalang jong ka kynhun Myntri ba nyngkong eh jong ngi kaba la long ha ka 11 tarik u Jymmang. U Rasmi Komal, Director ka jingkheiñ briew, un peit ïa ka jingtreikam baroh kawei.
Kane kan dei ka sien kaba nyngkong eh ban pynlong ïa ka jingkheiñ briew lyngba ka Digitalised System,” u la bynrap.
Ki nongtrei sorkar jylla kiba don bynta ha kane ka jingkheiñ briew kin lum ïa ki jingtip da kaba pyndonkam da ki Mobile Phone.
Yn shna ruh ïa ka app kaba kyrpang na ka bynta ki nongtrei sorkar na ka bynta katei ka jingtreikam, kaba dang pynlong ha Bengal hadien 15 snem.
U Myntri Rangbah u la kdew ruh ïa ka jingkynnoh ba don ki jingkylla ha ka jingbun briew ha ki bynta jong ka jylla, da kaba pynshong nongrim ïa ki ha ka jingwan rung tuh jong ki briew ba nabar u pud u sam.
Kane ka jingpyntreikam ha kane ka sien ka ban wan na ka bynta ka jingkheiñ briew kan sa ïarap ban khanglad ïa ka jingrung beaiñ jong ki bar ri.
“Ngi don ïa u khappud bym don jingker uba jrong 600 km bad ka Bangladesh. Namar ba ka sorkar jylla barim kam shym la aiti ïa ki jaka sha ki shipai BSF kumta ym shym la lah ban pyndep ïa ka jingker kynroh, kaba la wanrah ïa ka jingwan buhai shnong bad ka jingkylla ha ka jingbun briew ha ki bynta jong ka West Bengal,” u la ong.
U la ban jur ba ka jingkheiñ kaba thikna ka long kaba donkam bha na ka bynta ka jingsynshar bad ka jingthmu.
U Myntri Rangbah ka jylla u la ïashim bynta ha ka jingïalang ha Nabanna ha kaba ïadei bad ka bynta ba nyngkong jong ka ‘Census of India, 2027’.
