New Delhi, Jylliew 04:
U Lavkesh Bajaj, uba dei u trai jong ka jaka sah kaba ju pynbiang jaka thiah bad jingbam step ka Flourish Stay ha kaba ka ding kaba shyrkhei ka la shim ïa ka jingim jong 21 ngut ki briew ha ka sngi Balang, u la phet krad na kane ka jaka ba la jia ka jinpluh ding namar ka jingsheptieng palat. U Bajaj u la shah kem tang katto katne kynta hadien ba ka ding ka la bam duh ïa ka jaka sah ha ka jaka ba la khapngiah bha jong ka Hauz Rani ha ka nongbah Malviya Nagar jong ka nongbah Delhi. Ha ka jingtohkit hynnin ka miet, u Bajaj u la kam ba u la phet krad na katei ka jaka katba ki briew ki dang pyrshang ban phet krad na ka ding kaba la bam duh ïa katei ka ïing kaba san mala. U Bajaj, ha ka por ba shah kylli jingkylli, u la ong ba u shu ñiah kali lyngba ka hotel jong u kaba dang ing ha ka jaka ban sangeh ban ïarap ïa ki briew ban pyllait im ïa kiba sahkut ha ka ding. U la phet noh na kata ka jaka namar ka jingtieng. Um shym la leit phai sha la ïing. U Bajaj ha ka jaka kata u la shu shang pynlut por kylleng kylleng. U Bajaj u la ïoh ïa katei ka ïing na ki Ahluwalia bad ka dang pynïaid ïa ka ïing hotel bad ka ïing sah briew hapoh jong ka. Kane ka ïing mynshwa ka la don ka dukan Khadi. Wat ha katei ka por ruh katei ka ïing ka la jot rathai bha, u la ong. Ha kaba ïadei bad kane ka jingjia, ka la don ka durkhih kaba la saphriang bha ka pyni ïa u nongwei uba ïeng halor ka tnum jong kawei ka ïing kaba san mala kaba la ing, u bat ïa u dieng, u wad ïa ka lad ban hiar shapoh. U Bajaj u la pynthikna ba u la ïoh ïa ka license hapoh ka skhim ‘BnB’ (bed-and-breakfast), ha kaba la shah tang hynriew kamra. Hynrei la kynnoh ba u pyntreikam ïa ki 25 tylli ki kamra, kynthup ïa ki katto katne tylli kiba don ha ka kamra ba shapoh. Ki pulit ka nongbah Delhi ki dang pynshisha ïa baroh ki jingïathuh jong u Bajaj ha ka jingtohkit bad rah ïa u hakhmat ka ïingbishar. Ki pulit ki lah ban pan por ban set phatok san sngi ïa u na ka bynta ka jingtohkit. Ïa ka skhim Bed and Breakfast, ba la wanrah hapoh ka phang pdeng jong ka Incredible India B&B (2007), la shna khnang ban kyntiew ïa ki jaka sah ha ki ïing kiba shngaiñ bad kiba biang dor ha ki jaka sah briew. Kum shi bynta jong ka jingtohkit, ki pulit ki dang tohkit lada ka B&B ka la kohnguh ne em ïa ki kyndon jingïada. Ka jingtohkit kaba nyngkong ka la lap ba katei ka ïing ka don tang kawei ka jaka rung bad jaka mih, kaba la pynlong ïa ki nongwan ban shem jingeh ban mih noh. Nalor kata, la khang ïa ki jingkhang, bad ïa ka jingkhang ba kongsan la pyntreikam da ki sensor. Ka ding ka la sdang ban pur ha ka por kumba 8:30 baje mynstep ha ka kamra ba shapoh jong katei ka B&B bad hadien kata ka la pur sha ki mala ba shalor. Kiba bun ki briew kiba sah ha kane ka ïing ki dang ïohthiah ha ka por ba ka ding ka la pur. La pyntreikam haduh 17 tylli ki kali pynlip ding ban tehlakam ïa ka jingpluh bad ym duna ïa ka 58 ngut ki briew la shah pyllait im bad la pynkit mar mar sha Max Hospital kaba don hajan. Na ki 21 ngut kiba la shah pynbna ba ki la ïap mar ïa poi ha ka jaka sumar, 12 ngut la ithuh ba ki dei ki bar ri. Kiba ïap ki kynthup ïa 8 ngut na kawei ka longïing kaba la wan ban peit ïa u bahaïing jong ki uba pang. U Vivek Agarwal, uba dei u Chartered Accountant na Sector 46 ha Gurugram, u la leit sha Delhi ban leit jngoh ïa la u kpa , u Radhe Shyam Agarwal, uba la 80 snem ka rta – uba dang shah sumar mynta ha Max Hospital ha Delhi. Ka kurim jong u, ka Tarjani Agarwal, arngut ki khun kynthei, ka Jivisha bad ka Varya bad saw ngut kiwei pat kiba haïing hasem, ki la leit lang bad u. Ryngkat ki la buh ar tylli ki kamra ha ka Flourish Stay B&B bad ki dang ïabam jingbam step ha ka por ba jia katei ka jingjia. Na ki 8 ngut ki bahaïing kiba la ïap, tang uwei uba dang im bad une u dei u kpa jong u Vivek.
